Chennai, Risaw:
U General Secretary jong ka seng AIADMK, u Edappadi K Palaniswami (EKP), ha ki khyndiat sngi ba la leit, u la kyntait halor ka jingkynthoh jong u Myntri Rangbah ka jylla, u MK Stalin, ba ka seng ka la nang tlot, bad kam ba ka jingsynshar jong ka AIADMK hapdeng ki briew ka nang kiew.
Haba kren sha ki nongïalam ka seng ha Nangavalli, u la ong “u Myntri Rangbah u la ong ha Namakkal ba ka DMK ka la ïoh bor bad jingkyrshan ha ka ilekshon Lok Sabha bad ka AIADMK ka la tlot. Kam long kaba shisha. Ha u snem 2019, ka AIADMK ka la shah rem ha Namakkal Lok Sabha konstitwensi da ka jingïapher kaba 3 lak vote, hynrei ha u snem 2024, ka jingjop jong ka DMK ka long tang 30,000 vote ha Namakkal. Ki briew ki lah ban sngewthuh ba ki vote jongno ki nang hiar.”
Haba jubab ïa kawei pat ka jingkynnoh jong u Stalin ba u thrang ban ïatreilang, u Palaniswami u la ong, “Ka AIADMK ka dei ka seng kaba khlaiñ bad dei na kane ka daw ba wat ki seng riewlum ruh ki kwah ban ïatreilang bad ngi. Dang shen, ki seng kiba don ha ka kynhun synrop jong ka DMK, ki la kren shaphang ki mat kum ka jingïakhih jong ki nongtrei Samsung bad ka jingpynkiew khajna ïa ki mar ki mata. Da kaba pynshong nongrim ïa kata, ngi la ong ba ka don ka jingkulmar ha ka kynhun synrop jong ka DMK. Hynrei u Myntri Rangbah ka jylla u Stalin u la ong ba nga dang phohsniew shaphang ka jingkhlad noh jong ka jingïatehlok. Da ka jingkyrshan jong ki paidbah ka Tamil Nadu, ka AIADMK ka la pynkhreh ban ïakhun ïa ka ilekshon Assembly ha u snem 2026. Kiwei pat ki seng saiñ pyrthei kin kwah ban don ka jingïatehlok bad ka AIADMK. Ngim shym la phohsniew ïa ki jingïatehlok, u Myntri Rangbah u dei uba dang phohsniew ha ka por mynsngi ïa ki jingïatehlok. Ka jingphohsniew ha ka por mynsngi kan ym treikam satia.”
Shuh shuh, u Palaniswami u la ïanujor ïa ka AIADMK bad u syntiew bad ong ba ki ngap kin wan kumba dei ban long bad ban kjit ïa ki umthiang.
