Shillong, Risaw 28
Ka Laitkor SC ka la ïoh jingjop ba ar ha ka lympung ïalehkai Shillong Premier League 2024, hadien ba ka la lah ban pynliem noh ïa ka Sawmer SC da 2-0 kol hakhmat ki spah ngut ki nongkyrshan kiba la wan ban sakhi da la ki jong ki khmat ha ka Lah Sngi U Blei ha SSA Stadium kaba ha First Ground, Polo.
Kane ka nam jop ka la wan urlong lyngba u Risuk Malngiang bad u Fridison Wanñiang na ka bynta ban pynlong ïa katei ka kynhun ban ïoh 6 point na ki lai sien ïakhun.
Hadien ba ka la jop ïa ka Nangkiew Irat ha ka jingïakhun ba ar, ka Laitkor ha kane ka kynti kaba bynta ka la bteng ban ïalehkai bha naduh kaba sdang. Kumjuh ka Sawmer kaba la pyrshang ban ïakhun tyngeh na ka bynta ban ïoh pynkhih jar.
Hadien shiteng kynta ka Laitkor ka la pynkhih jar nyng-kong eh lyngba u Risuk ha ka minit kaba 32. Kane ka shi kol ka la nangpynïoh ïa kane ka kynhun na ka bynta ban bteng ha ka ban ïakhun tyngeh bad kumjuh ka liang pyrshah kaba pyrshah ban pynphai, hynrei kam shym la lah ban pynurlong haduh kaba kut jong ka kylla step.
Hadien katto katne por ba la bteng ïa ka kylla miet kine ki kynhun ki la pyrshah ban ïakhun tyngeh shuh shuh na ka bynta ban ïoh thep kol, hynrei kim shym la lah ban pynurlong. Hashwa ban wai u Fridison u la ïoh ban thep kol ha ka minit kaba 90+3 na ka bynta ban pynlong ïa ka Laitkor ban khur syndon ïa ka jingjop.
Lyngba kane ka jingjop, ka Laitkor ka la ïaryngkat mar 6 point ryngkat ka Shillong Lajong bad ka Mawlai, kiba don ha ka kyrdan ba nyngkong bad ba-ar.
Ka jingïalehkai ha ka Sngi Ba-ar kan long hapdeng ka Langsning FC pyrshah ïa ka Nangkiew Irat SC ha ka por 5:30 janmiet.
