Shillong, Risaw 29
Ka Nangkiew Irat SC ka la wanphai da ka jingjop kaba nyngkong eh ha ka Shillong Premier League, hadien ba ka la lah ban pynliem noh ïa ka Langsning FC da 3-1 kol ha ka Sngi Ba-ar ha SSA Stadium kaba ha First Ground, Polo.
Kane ka la wan urlong lyngba u Wallamsuk Nongkhlaw, uba la lah ban thep ar kol na ka bynta ban pynlong ïa ka Nangkiew ban ïoh ïa ki lai point.
Ha kane ka jingïakhun baroh ar ki kynhun ki la pyrshang ban ïalehkai bha, hynrei dei ka Langsning kaba la ïoh ban pynkhih jar nyngkong eh lyngba u Dauruhipaïa Pale ha ka minit kaba 17. Kane ka shi kol ka la nangpynïoh mynsiem ïa ki rangïalehkai kane ka kynhun na ka bynta ban ïakhun tyngeh.
Ha shwa ban kut ka jingïalehkai jong ka kylla step, ka Nangkiew Irat ka la lah ban pynphai kylla lyngba u Isak Vanlalpeka (43) na ka bynta ban ïakhaid mar shi kol.
Hadien katto-katne por ba la bteng ïa ka jingïakhun jong ka kylla miet, ka Nangkiew Irat ka la ïoh ban thep biang sa ar kol lyngba ki ar tylli penalty ba la shut da u Wallamsuk Nongkhlaw ha ka minit kaba 66 & 78. Kumta haduh kaba kut ka jingïalehkai ka Langsning kam shym la lah shuh ban pynphai bad ka la mad ïa ka jingshah rem ba ar ha kane ka lympung.
Haba phai sha ka jingïalehkai First Division Football League 2024 kaba la long kham ha shwa, ka Malki ka la pynliem noh ïa ka Nongrah SC da 1-0 kol bad ïa kane la thep da u Niklestone Ryntathiang ha ka minit kaba 60.
Ka jingïalehkai jong ka SPL ha ka Sngi Balang kan long hapdeng ka Ryntih SC pyrshah ïa ka Rangdajied United FC ha ka por 5:30 janmiet.
