Shillong, Risaw 30
U Harshit Rana un ym lah ban ïalehkai na ka bynta ka Delhi ha ka Ranji Trophy namar ïa une u rangïalehkai (all-rounder) la bthah ba un ïasoh sha ka kynhun ïalehkai ka ri India na ka bynta ka jingïalehkai Test kaba lai ka ban long ha Mumbai pyrshah ïa ka New Zealand ka ban sdang naduh ka 1 tarik u Nai wieng bad la sngewthuh ba ïa kane ka rai la pynsngew sha ki bor pynïaid ka Delhi ka ban duh noh ïa utei u rangïalehkai ha ka jingïalehkai kaba saw.
U Ajay Ratra (senior selector) u la don lang ha madan ïalehkai Arun Jaitley ha kaba u Rana u la ïashim bynta ha ka jingïalehkai jong ka Delhi kaba la ïakhun pyrshah ïa ka Assam. Hadien ba u la tied ïa ki 50 run ha ka wat kaba nyngkong, u la long u rangïalehkai uba paw bad hadien u la lah ruh ban shim 2 wiket ïa ki nongtied ka Assam kaba la mih ban tied. Une u rangïalehkai ba dang khynnah u la don bynta shibun ha ka jingjop ba pura jong ka Delhi da ki shiphew wiket.
Kumba ka paw u Rana u la don hapoh ka kynhun ïalehkai ka India na ka bynta ki ar tylli ki jingïalehkai Test, hynrei la shah ïa u ba un leit ïalehkai ha ka Ranji Trophy pyrshah ïa ka Assam.
U la leit kylleng ryngkat bad ka kynhun jong ka India la bun sie, hynrei um shym la ïoh lad ban ïalehkai. Ka selection committee jong katei ka kynhun ïalehkai (senior) ka la jied ïa ki rangïalehkai ba kham heh jong ki shynrang ba la ïalam da u Ajit Agarkar ka la hap ban shaniah tylli ha utei u rangïalehkai uba dang 22 snem ka rta bad la kynthup ruh ïa ka kyrteng jong u hapoh ka kynhun na ka bynta ka Border Gavaskar Trophy ka ban long ha Australia naduh u bnai ban wan.
Watla um don shibun ka jingshemphang ha ka rukom ïalehkai ‘First Class’ hynrei ki nongjied ki sngewskhem bha ïa ka jinglah jong u ha baroh ki liang bad ki sngew ba u lah ban long uba rit napdeng ki nongïalehkai hynrei u lah ban pynpaw ïa ka jingtbit wat hapdeng ka jinglong jingman ha Australia.
Kan ym long kaba phylla lada ka India kan ailad ïa u ha ka sien kaba nyngkong eh ha ka jingïalehkai Test pyrshah ïa ka New Zealand hashwa ban ïatynjuh bor pyrshah ïa ka Australia.
Kumba ka pow ka New Zealand ka la dep ban khur ïa ka Series da 2-0 hadien ba ka la jop ha Bengaluru bad Pune. Te kumta ïa ka Test kaba lai kan long ha Wankhede Stadium.
Ki kyrteng ki rangïalehkai ka India ban ïakuhn pyrshah ïa ka New Zealand ki kynthup ïa u Rohit Sharma (C), Jasprit Bumrah (VC), Yashasvi Jaiswal, Shubman Gill, Virat Kohli, KL Rahul, Sarfaraz Khan, Rishabh Pant (WK), Dhruv Jurel (WK), Ravichandran Ashwin, Ravindra Jadeja, Axar Patel, Kuldeep Yadav, Mohd. Siraj, Akash Deep & Harshit Rana.
