Shillong, Risaw 31
Ka jingïai ap khmih lynti ka 7 Wasa United FC ban ïoh jingjop kam shym la urlong ha kaba ka la mad biang ïa ka jingshah rem sa ha ka Mawtari Myrdon da 2-0 kol ha ka jingïalehkai jong ka Meghalaya State League 2024 ha ka Sngi Palei ha Wahïajer.
Ha kane ka sngi la pynlong tang kawei ka prokram ïalehkai. Ka nam jop jong ka Mawtari Myrdon ka la wan urlong lyngba ar kol ba la thep da u Silbestar Kharbani (54 & 70).
Ka Mawtari Myrdon ka la jop ïa ka jingïakhun kaba nyngkong pyrshah ïa ka Seinbhalang Shkentalang da 3-1 kol lai sngi mynshwa, katba ka 7 Wasa ka la shah rem noh da 9-0 kol ha ka Shillong Lajong ha ka sngi sdang ïa kane ka lympung myn ha ka Sngi Saitjaiñ.
Kane ka jingshah rem ha ka sien kaba ar ka la pynlong ia ka 7 Wasa kaba la bat teng ïa ka nam lahduh ha ka MSL, ba kan duh noh ïa ka lad ban jam sha ka quarter final na katei ka group.
Kumba ka paw ki kynhun ki ban bat ïa ki kyrdan ba hakhlieh bad kiba kynsai ki ban wan ha ka kyrdan ba-ar kin ïoh rung sha ka quarter final jong kane ka lympung.
Hadien kaba kut jong ki ar sien ïakhun jong kane ka group, ka Lajong bad ka Mawtari Myrdon ki la kami mar 6 point. Te kumta kine ki kynhun kin hap ban ïakhun tyngeh na ka bynta ban ïaknieh ban bat ïa ka kyrdan ba nyngkong bad ba-ar ha ka Group-E.
