Mumbai, Naiwieng:
Ki pulit jong ka Mumbai ki la bteng ban pynlong ïa ka jingtohkit kaba bniah hadien ba ki la ïohkem sa ïa uwei u briew na Bandra uba la byrngem ban pynïap ïa u khlur ak phlim ka Bollywood u Salman Khan bad dawa ïa ka pisa kaba T. 2 klur.
Une u briew u la shahkem ha ka sngi Balang shi sngi hadien ba u la phah ïa ka khubor byrngem ban pynïap ïa u khlur ak phlim lada ba um siew ïa kane ka pisa. Kumba la ïathuh ka tyllong khubor, la ong ba une u briew uba la shahkem u dei uba la tip kyrteng kum u Azam Mohammed Mustafa, u nongshong shnong jong ka Bandra East.
Ki pulit ki la pynjur ïa ka jingleit thwet bad jurip bniah sha kylleng ki jaka kat kaba ki nang ïoh ïa ki sabut na ka jingphla jong kine kiba la shahkem khnang ban ïohkem lut ïa ki runar kiba dang ïai bteng ban phah ïa kum kine ki khubor pyntriem bad buh jingsyier ïa kiba bun ki riewpawkhmat bad ki riewpawnam khamtam lada dei shisha kiba na ka kynhun runar u Bishnoi.
Ban nang pynjur ka jingbyrngem pynïap pyrshah ïa u Salman Khan, ka khubor kaba khlem pynpaw kyrteng sha ki bor pynïaid kali ha Mumbai ka la byrngem ba ïa u khlur ak phlim yn pynïap lada um siew ` ïa ka `.2 klur kumba la dawa, la ïathuh ki tyllong khubor ba la wan na ki pulit.
Ki pulit ki la buh jingthoh pyrshah ïa u briew bym lah ban ithuh bad ka jingtohkit ka dang ïaid shakhmat. Ïa kane ka mukotduma la buh hapoh ki kyndon kiba ïadei bad ka jingbyrngem ban dawa pisa bad ka jingbyrngem pynïap.
Kane ka la jia khyndiat por hadien ba uwei u samla uba dang 20 snem ka rta ba la tip kyrteng kum u Mohammad Tayyab u la shah kem na Noida halor ka jingbyrngem pynïap ïa u khlur ak phlim bad u MLA u Zeeshan Siddiqui uba dei u khun jong u nongïalam ka NCP (Ajit Pawar) u Baba Siddique uba la shah siat ïap ha ka 12 tarik, Risaw.
Ki pulit ki la rah ïa u Gufran . Khan sha Mumbai na ka bynta ban set bad ban tohkit ïa u.
Hashwa, ki pulit ka Mumbai, ki la kem ia u Shaikh Hussain Shaikh Mausin, uba dei u nongdie jhur ba 24 snem ka rta, uba na Jamshedpur, halor ka khubor byrngem, kaba la ïoh pdiang da ka WhatsApp jong ki pulit pynïaid kali jong ka Mumbai. Ka khubor byrngem ka la dawa ` 5 klur.
U Salman Khan, ha ki por ba la dep, u la ïoh ïa ki khubor byrngem pynïap na ka kynhun runar jong u Lawrence Bishnoi, kumba ka paw, ka dei na ka jingdonkti jong u, ha ka kam siat beaiñ ïa ki mrad ba la mudui mukotduma ha Rajasthan ha ka por ba la ring ïa ka phlim Hum Saath Saath Hain.
Ki briew kiba la suba ba ki dei ki dkhot jong katei ka kynhun runar, ki la siat shabar ka ïing jong utei tyngshop ha Bandra ha u bnai Ïaïong.
Ha kaba ïadei bad kane, la pynkhlaiñ ïa ka jingpahara hadien ka jingshah byrngem pynïap jong une u khlur ak phlim.
Ha kaba sdang jong u bnai ba la lah, u MLA barim bad u nongïalam ka seng NCP (Ajit Pawar), u Baba Siddique, uba la tip ba u dei uba ïajan bha bad u Salman Khan, u la shah siat ïap hajan ka ophis treikam jong u Zeeshan, u khun jong u, ha Mumbai.
Haba paw pyrthei ha ka TV show Bigg Boss 18 sngi hadien ka jingshah pyniap jong u Baba Siddique, u Salman Khan u la ong ba um kwah ban don biang ha katei ka lympung, hynrei ki jingkular jong u ban trei ki la wanrah biang ïa u ha ka rynsan.
U Salman u la ong ba um sngewkwah ban ïakynduh ïano-ïano ruh namar kane ka jingeh kaba u ïakynduh.
