Agartala, Naiwieng:
Ki shipai BSF ha Tripura ki la kem ïa uwei u nongkhaïi beaiñ na Bangladesh bad ki la ïoh ban kurup saw hajar tylli ki dawai kuli Yaba na ka kti jong u.
Da kaba leh katkum ki jingai jingmut ba kyrpang, ki bor pahara, ha ka 29 tarik, Risaw ki la pynpulom ïa ka jingpyrshang ban shalan tuh ïa u drok. La ïoh ban kurup 4,000 tylli ki dawai kuli Yaba kiba shongdor T.80 lak.
Ha ka 29 tarik, ki shipai kiba peitngor jong ka BSF ha Tripura ki la jop ban khanglad ïa ka jingpyrshang ban shalan tuh ïa u drok ha khappud Indo-Bangladesh.
La ïoh kem ïa uwei u nong Bangladesh uba don bynta ha kane ka kam sniew.
Ha shwa kata ha ka 27 tarik, Risaw, ki bor pahara ki la kem ïa 15 ngut ki briew ba kynthup ïa ki khynnah rit, ha ki ar tylli ki jingkhynra ba kyrpang ha khappud India bad Bangladesh ha Tripura, la ïathuh ki heh pulit.
Lah ban kdew ba 9 ngut ki nong Bangladesh ki la shah kem ha Agartala Railway Station ha ka jingkhynra kaba man ka sngi da ka Mobile Check Post jong ki bor pahara khappud. Kitei ki runar, kiba la shah pyllait jamin dang shen, ki la kam ba ki thmu ban shong jaka sah junom ha Kolkata.
