Nongstoiñ, Naiwieng 03
Kan dei ka sien kaba nyngkong eh hapoh ka Jylla ba la pynlong ïa ka jingïakop mareh lyngba ki lum ki them ïa kaba la tip ruh kum ka 1st Cross Country Race 2024 (open category) ba la pynlong da ka Strider’s Runners Club, Nongstoiñ ha kawei na ki jaka ha Mawlangkhar view point kaba ha West Khasi Hills ha ka Sngi Saitjaiñ.
Ïa kane ka jingïakop mareh kaba jngai 5 kilomitar, la wan ban ïashim bynta da 10 tylli ki kynhun ba kynthup 6 kynhun ha ka liang ki shynrang bad 4 kynhun jong ki kynthei kiba na West bad Eastern West Khasi Hills. Ki la don kumba 60 ngut kiba ïashim bynta ha ka liang ki shynrang bad kynthei ba kynthup 6 ngut ha kawei-pa-kawei ka kynhun.
Shuh shuh ha katei ka sngi u MLA ka Mawlai u Bah Brightstarwell Marba-niang u la long u kongsan ha ka jingdonlang ruh kiwei kiwei ki riew rangbah , ki dkhot jong ka Strider’s Runners Club ba kynthup ïa u Bah Donkupar Kharjana kum u Adviser, ka Kong Aibarishisha Lyngkhoi kum ka secretary bad kiwei kiba la ïashim bynta lang ruh ban sam ïa ki khusnam sha ki nongjop kiba long da ki syrnod kumjuh ruh ki song pisa.
Ïa ka nam lahduh ha katei ka jingïakop mareh ha ka liang ki shynrang la rah da ka Team-A, nangta kaba wan ba-ar ka dei ka Team-D bad ba lai pat ka Team-E. Katba ha ka liang ki kynthei ïa ka nam lahduh la rah da ka Team-H, ba ar ka Team-I bad ba lai pat ka Team-J.
Nangta shuh shuh ïa ka nam Dress Code ha ka liang ki shynrang la ïoh ban rah da ka Team-A bad ha ka liang ki kynthei la ïoh ban khur da ka Team-J.
Haba ai jingkren ha katei ka sngi u Bah Brightstarwell kum u konsan u la ong ba lynti ine i jingsdang iba rit i jingïamareh lehse kan dei ka jingktik ïa ki khun samla kiba dangeh ïa kiba dang ban trei shitom ban sngewthuh hangno ka sap ka don ban trei shitom ban poi sha ka thong.
“Nga kitbok kitrwiang na ka liang jong nga, ïa ka Strider’s Runner Club kane ka dei ka jingsdang lehse kumba ka long ka dei ka jingsdang bad ka don ka kyntien kaba ong ‘small is beautiful’ bad kano kano kaba sdang na iei iei iba rit ka don ïa ka lad ban nangheh ban nangsan ban nangkiew ban ïa kito kiba wan kum ki Umsaw bad ki bym don jingmut.” u la bynrap.
Te kumta u la kyntu ruh ïa ki nongmareh da kaba u la ong ba kane ka lah ban dei ka sien jam kaba nyngkong ka jong ki, hynrei u kyrmen skhem ba kan nym dei pat ka sien jam kaba khatduh, ka dei ka sienjam kaba nyngkong ka ban lam ïa ki sha kliar jong u lum bad buh ïa kata ka thong, ïa ka mynsiem kaba shynrang kaba kloi ban ïakhun.
