Raphael Warjri
Khlem da sngewphylla ne lyngngoh shuh ka paw pen ryngkew ba ki Dorbar Hima bad Dorbar Dalariti jong ka jylla ki la phyrnop ha ka bamsap bampong haduh ba la kynrei da ki dkhar ki raïot ha pdeng Ïewduh ba la jwat ban phai pat sha ka nongrim katkum ki riti dustur tynrai. Ka thong kaba khraw ka shong ha ki longsan mansan jong ka Dorbar Hima bad Dorbar Thawaiñ Dalariti (KHADC) ban phai dien sha ka mynnor bad ban thaw aiñ ka ba lah ban pynurlong biang ïa kata ka ba la seng ki longshwa manshwa. Ka nongrim ba ka Dorbar Thawaiñ Dalariti ka lah ban thwet ïa kita ki khuiñ jong ki riti dustur tynrai na ka bynta ban pynim biang bad pynlong aiñ ha Ïewduh ka long kaba kongsan haduh katta katta namar ba ka khaiï pateng ka dei u budlum ba kongsan ban tei ïa ka jaitbynriew bad ka imlang sahlang. Ki sohkyrdoh kiba la jyrwit jyrwat ha ki kam synshar bad bishar ha Ïewduh ki long kiba la jwat ban law ban loit, hynrei ym dei kiba ym lah ban long. Donkam ïa ki longsan mansan ba mynta ba kin ïeng rangbah kum ki khun dap shynrang ka kmie bad kumjuh ruh ki kynthei bad longkmie ki ban kdup la ka rympei ha la kut shadem ban kyntu kynpham ïa la ki pararangbah kiba bat ïa ka iktiar ha ka Dorbar Hima bad ha ka Dorbar Thawaiñ Dalariti lane wat ka sorkar jylla ruh ba kin imsngi bad duriap ban kyntiew ïa la ki khun ki hajar, ki paradoh parasnam.
Ym dei kaba phylla ba ka shkor briew kam ju kuman ne mynthi ïa ka sur jong ka tyngka, hynrei dei ban kynmaw dngong ba ym dei tang-ka kaba biang pura nadong shadong. Ka don ka burom akor jong ka longrynñieng shimet ba ym lah ban thew ïa ka dor da ka tyngka, hynrei kaba kamai burom na la ki khun ki hajar bad ki paidbah lada ïeng skhem ha la ka nongrim. Ym lah ban len ba ki paidbah ki kham burom ïa ki nongïalam kiba parum pareh ka kamai kajih, ka spah ka phew haba ki sam lem ha ka khep ba donkam.Hynrei kata baroh ka ïaineh tang shiïa arïa ha ba kita ki nongïalam ki dang bat ïa ka bor ka iktiar ba ki lah ban kynshew spah na ka bynta ban sam paidbah ha kano kano ka rukom. Ynda ki la duh noh lane kut noh ka ïa ban bat la ka bor ka iktiar, ki duh syndon la ka burom ka longrynñieng. Tang katto katne ki ba lah ban ïaineh shiryta ban ri burom la ka longrynñieng haduh ynda la dkut artat u saihukum.Lehse la donkam ban kyntu kynpham ïa ki longsan mansan jong ka Dorbar Hima bad ki dkhot jong ka Dorbar Thawaiñ Dalariti ba kin puson halor kita ki nong-rim jong ki longshwa manshwa ha ba ki seng ïa ka ïew. Wat lada khlem da pyrkhat shaphang ka nongrim ba la seng ki longshwa manshwa, ka mynsiem iatiplem ha kane ka juk mynta ruh ka tipthuh ba dei ban kyntiew shwa ïa la ki paradoh para-snam ha manla ki kam khamtam lei lei ha ka kamai kajih, ka khaiï pateng.
Lada ki dkhot (MDC) ka Dorbar Thawaiñ Dalariti (KHADC & JHADC) ki shlan bad shlur ban thawaiñ ki ban ïada shisha ïa la ki riti dustur, kata ka dei kawei na ki lad ban ïada ïa la ki khun ki hajar, ki paradoh parasnam. Ki riewstadaiñ ki lah ban pyrkhat bad duriap halor kane ka phang ban thaw aiñ ha ka nongrim ba tang ki khun ki hajar bad ki paradoh parasnam ki lah ban shong basa ha Ïewduh bad dei ban kyndang noh ïa ki dkhar ki raïot ki ba shong basa hapoh u pud u sam jong ka ïewniam ka ïewkyntang. Ki dawbah ba lah ban thaw aiñ lah ban pynshongñia na ki katto katne ki jinglong jingman ha ka imlang sahlang ha ka ba ïadei bad ka ïew ka hat, ka khaïipateng. Haba kdew ïa ka thymmei ka riti niam Ïewduh ka dei kaba dang ïaineh ban pynlong manla ka snem da u Lyngdoh Raij Mylliem ha ryngkat ka sad ka sunon naduh Mawnarian. Hangta ka shong nongrim ka ñia ka ba dei ban kit ka Dorbar Hima Mylliem ïa ka khia ka shon jong ki khun ki hajar lajong.Ki basa ha Ïewduh ki dei ban long tang na ka bynta ki khun ki hajar, ki paradoh parasnam bad ym bit satia ïa ki dkhar ki raïot. Kumta ka jingkiew jong ki dkhar ki raïot ha Ïewduh dei ban tohkit da ka Dorbar Thawaiñ Dalariti na ka Dorbar Hima Mylliem.
Ka Dorbar Thawaiñ Dalariti ka lah ban thaw aiñ katkum ka nongrim jong ka riti dustur tynrai bad sa ai hukum ïa ka Dorbar Hima Mylliem ban pyntreikam.Khlem artatien ki kynrum kynram na ka aiñ ha jylla kin sa mih hynrei lah ban pyrkhing da ka aiñ pura bad synjor da ki kyndon ban pynneh ïa ki basa ha Ïewduh tang na ka bynta ki khun ki hajar bad ki paradoh parasnam. Ha kaba khatduh dei ban shimti noh na ki dkhar ïa ki basa hapoh u pud u sam jong ka Ïewduh katkum ka aiñ ban thaw hi da ka Dorbar Thawaiñ Dalariti. Lada ki dkhot ka Dorbar Thawaiñ Dalariti kim kotbor kum kata ka rukom, la donkam ka kynpham bad ai jingmut na ki riewstad aiñ ba tbit kiba dei hi ki paradoh parasnam lajong kiba shitrhem ruh ha kane ka bynta. Kawei pat ka bynta ka long halor ka nongrim jong ka Khyrnit Bahynriew kaba dei ban ïada bad pynneh ïa ki riti dustur tynrai. Tang da kine ki artylli ki ñia ka la biang ban thaw aiñ, hynrei lah ban phnieng shuh da kiwei kiwei ki kyndon ban pyrkhing haba dei ban khanglad bad ban synjor haba dei ban adkar, khnang ban ym shah kyrtoh kylla.
