New Delhi, Naiwieng:
U Myntri ka sorkar kmie u Pralhad Joshi u la kynthoh jur ïa ka Congress halor ka ‘Shakti scheme’ bad u la ong ba kane ka seng ka ai jingkular ban pyntreikam ïa ka na ka bynta ban ïoh vote.
“Ha kane ka sngi u National President ka Congress u Mallikarjun Kharge u la ong ba ngi dei ban ai jingkular katkum ba ka mang tyngka jong ngi ka ailad bad ha kaba ïadei bad ka jingïapher hapoh u Myntri Rangbah bad u Symbud Myntri Rangbah bad kiwei kiwei ki Myntri…Ka Congress ha baroh kawei ka ri ha kiba bun ki jylla ka ai ki jingkular lamler bad kam ju lah ban pynurlong…Ki ai ïa kine ki jait jingkular tang na ka bynta ban ïoh vote,” ong u Pralhad Joshi ha ki lad pathai khubor.
Kane ka long hadien ba u President ka Congress u la ai jingmut ïa ki kynhun jong ka Congress kiba leit sha ka jingthep vote da kaba maham ïa ki ban pynbna ïa ki jingkular halor ka nongrim jong ka mang tyngka jong ki.
Ha ka jingïalang bad ki nongthoh khubor, u la pynpaw ïa ka jingdonkam jong ka jingkitkhlieh ha ka liang ka pisa tyngka, da kaba ong ba lada ka sorkar kam lah ban pyndep ïa ki jingkular jong ka, ka lah ban wanrah ïa ka nam kaba sniew bad ka jingeh ïa ka imlang sahlang.
U Kharge u la ong,” Ha Maharashtra, nga la ong ba kim dei ban pynbna 5, 6,10 ne 20 tylli ki jingkular. Ki dei ban pynbna ïa ki jingkular katkum ka mang tyngka. Lym kumta, kan don ka jingduhnong. Lada ym don pisa na ka bynta ki surok, baroh kan kylla pyrshah ïa phi. Lada kane ka sorkar kan pulom, ka pateng ban wan kan ym sah ei ei hynrei tang ka jingbudnam sniew. Kin hap ban im ha ka jingshah kyntait haduh 10 snem.”
Kane ka jingkren jong u Kharge ka long hadien ba ka sorkar Congress ha Karnataka ka la ai jingmut ba ka lah ban bishar bniah biang ïa ka skhim Shakti kaba pynthikna ïa ka jingpyllait ei khlem donkam siew ïa ka bai bos na ka bynta ki kynthei.
Hynrei ha ka Sngi Palei, u Myntri ba tnat Transport ka Karnataka u Ramalinga Reddy u la ong ba kan ym don kano kano ka jingbishar ne jingpynsangeh treikam ïa kane ka skhim.
Ha shwa kane ka sngi, u Symbud Myntri Rangbah ka Karnataka, u DK Shivakumar, u la bishar biang ïa ka jingkren jong u bad ong, “Ka jingbuh jingkular jong ka Karnataka, ka dei ka bynta ba la buh na ka bynta baroh kawei ka ri. Ka seng BJP bad kiwei kiwei ki seng ruh ki shim ïa ka bad ngi sngew sarong ba ngi la lah ban pyntreikam ïa kata bad ngi la lah ban pynpoi ïa kata.”
Ki paidbah ka Karnataka bad ka ri ki sngewkmen bha ïa ka rukom pyntreikam jong ngi, ” ong u Shivakumar ha ki nongthoh khubor.
