Nongstoiñ, Naiwieng 04
Ka kynhun ïalehkai jong ka Kyllum -lang Veterans FC na Shillong ka la long ka lahduh ha ka lympung ïalehkai 1st Veteran Knockout Football Tournament 2024 ba la pynïaid da ka New Nongstoiñ Sports Social & Cultural Club (NNSSCC).
Kane ka nam tam ka la wan hadien ba ka la lah ban pynliem noh da 3-1 kol ïa ka Nongstoiñ Football Association (NFA) lyngba ka tie-breaker hadien ka jingïakhaid da mar shi kol ha ka jingïakhun final kaba la long ha ka Lah Sngi U Blei ha madan New Nongstoiñ.
Ha katei ka sngi na ka liang ka NNSSCC ka la pynkup burom ïa u samla rangbah jong ka shnong New Nongstoiñ bad u Adviser jong ka klob u Bah Max John Donbok Nongsiej kum u National Referee bad mynta uba la shah jied ruh kum u Referee Instructor napoh ka Jylla.
Ha katei ka jingïakhun final, u Bah W.D.Marngar uwei na ki ‘riew rangbah na ka thaiñ Laitkseh, West Khasi Hills u la long kum kongsan, ha ka jingdonlang ruh u samla Gracious Syliemlieh, President ka NNSSCC, u samla Landarlin Marbaniang, General Secretary, ki ‘riew rangbah bad kiwei-kiwei kiba la ïoh ruh ban sam ïa ki khusnam sha ar tylli ki kynhun bad kynthup ïa ka song pisa, ki takma ha ryngkat ka trophy.
Lah ban kdew hangne ba ha katei ka lympung ki don kumba 16 tylli ki kynhun na kylleng ki jaka ka Jylla kiba la wan shim bynta.
