Paris, Naiwieng:
Katkum ka khubor la ong ba saw ngut ki khynnah kiba dang hapoh 18 snem ka rta ki la mynsaw na ka jingshah mait da u sdie hapdeng ka jingiakynad jong ki hapoh ka rel ha Paris. Na ka liang ki pulit ki la ioh kem noh ia utei u nongpom ha katei ka jingjia.
Ar ngut napdeng kiba mynsaw, ki dei kiba la mynsaw jur katta-katta bad la pynkit ia ki mar-mar sha ka jaka sumar kaba don hajan eh na ka bynta ki jingsumar kiba kyrkieh bad kloi-lan. Uwei napdeng kitei ki khynnah 16 haduh 17 snem baroh kiba mynsaw, u dei uba la shah mait kti bad uwei pat u la shah phiah arliang ka shyieng khlieh, ha kaba la iohi ia ki dohjem bad ka jabieng jong u ha ka por ba ki pulit ki leit ban rah ia kitei kiba mynsaw.
Katba, ar ngut kiba mynsaw pat ki dei kiba la shu mynsaw malu-mala bad ki pulit ki la iathuh ba kane ka la jia ha ka por kumba 8 baje jong ka step Lah Sngi U Blei, katba ki dang thmu ban leit sha ka jaka pule jong ki.
Ia mynta hi ym pat shem ia ka daw jong katei ka jingjia hynrei ki tiar kiba ki pyndonkam ki kynthup ia ka tari, u sdie, ki dieng tied ‘baseball’ bad ka waitlam ‘Samurai’ bad ia baroh kitei kiba mynsaw la pynkit sha kajuh ka jakasumar, ha kaba ki doktor ki la pyntip baroh 4 ngut ki la lait na ka jingma kaba ap ia ka jingim jong ki.
Ia u suba don kti ha katei ka jingjia, la ioh kem noh napoh ka iingsah jong u hi bad ki pulit ki la rah noh ia utei u khynnah 16 snem sha thanat naka bynta ki jingtohkit bniah.
Hapdeng ka jingleit khynra jong ki pulit hapoh ka iingsah jong utei u khynnah 16 snem, ki la ioh kurup noh ruh ia utei u sdie uba don hapoh iing bad ba u la buhrieh bha ha ka jaka kaba kham kyndong.
Kane ka la jia ha katei ka step Sngi Nyngkong, katba katei ka rel RER ka dang mut mih na ka station ha Ozoir-la-Ferriere, kaba sha ka phang Southeast jong ka nongbah Paris.
Kumta, la ong ba namar katei ka rel kam pat mih ne ïaid na katei ka station, kam shym la don kano- kano ka jingthud ia ka leit- ka wan ne ka por ïaid jong kiwei pat ki rel ha katei ka sngi.
