Washington, Risaw:
U President jong ka America, U Donald Trump, u la pynbna ha ka Sngi Balang, ba ïa ka jingpyniap ïa u nongthombor ïa ka ktem shipai, uba la shah rai pynrem ban shah siat iap da ki suloi, yn nym pyni paidbah shuh, da kaba kyntait ïa ka jingthmu, kaba la pyrshah da u Secretary jong ka ri, U Pete Hegseth.
Namar la ong ba ka jingthmu pyni paidbah ‘Livestream’ ïa ka jingshah pyniap jong U Nidal Hasan, ka la wanrah ïa ka jingpyrshah kaba jur hapoh ka ri bad wat nabar ri, kaba la wanrah ruh ïa ka jingbitar na ki riew saiñ pyrthei jong ka US Democratic bad Republican, ka Balang Katholik bad ka United Nations.
Katei ka jingshah sospon, ka dei ka jingtyngkhuh ïa U Hegseth, uba la don bynta ha ki jingiakhih, halor ka thma Iran, kaba la pynjynjar ïa ka seng Republican jong U Trump, ha shwa ka ilekshon shiteng samoi ha u Naiwieng.
U Hasan, “un iap, kumba la buh por, da kaba shah siat ha ki pulit, hynrei ïa kane ka jingjia, yn nym pyni stream”, la ong u Trump, ha ka post jongu, ha ka Truth Social platform jongu.
U President jong ka US u la pynpaw ba um pyrshah shimet ïa ka jingthmu ban pynbthei bom, da kaba ong ba ka lah ban long ka jingkhanglad kaba khlaiñ bha ïa ka Pyrthei ban sakhi kumno ka America ka leh ïa ki lehnoh bad ki SCUM kum u Hasan.”
Hynrei “bun ki briew kiba bha, kiba don ka jingmut kaba bha kin kham sngewbha ban ym peit ïa u ba un ïap,” ong u Trump, da kaba bynrap ba ïa ka jingpynïap briew dang lah ban peit hi dalade da ki bahaïing hasem ba jan jong ki nongshah pynïap lada ki kwah ban leh kumta.
U nongaiktien ka Pentagon, U Sean Parnell, u iathuh ba U Hegseth bad U Trump, ki la ïa kren shwa ban pynbna.
“U Secretary u kyrshan ïa ka rai jong u President, bad ki mynjur pura”, la ong u Parnell ha ka kyrwoh.
Ka jingpyniap ïa u Hasan, kaba la buh por ha ka 3 tarik u Naiwieng ha Fort Hood, Texas, ha kaba u la siat pyniap ïa 13 ngut ki briew ha u snem 2009, ka dei ka sien kaba nyngkong da ka bor siat jong ki shipai US naduh u snem 2009.
Ha ka taiew ba la dep, u Hegseth u la ong ba “ngin sa pynthikna ba ki briew kin peit ïa ka, ba kan paw paidbah,” hadien u la pynthikna ba ka jingthmu ka long ban pynbna paidbah ïa katei ka jingshah pyniap.
“Ki briew ki donkam ban sngewthuh ba… ka don shibun ka jinglah na ka bynta kine ki jait jingjia,” u la ong.
Ka jingpyrshah pyrshah ïa katei ka jingthmu ka la nang jur hadien ka jingpynbna jong u Hegseth.
Ka United Nations, ka ong ba ka jingpynbna paidbah ïa katei ka jingshah pyniap, kan dei ka jingpynshitom bein, katba u president jong ka US Conference jong ki Bishop Catholic, u ong ba ka dei ka jingsaphriang kaba shyrkhei, ïa ka kolshor jong ka jingiap, bad baroh arngut ki myntri rangbah jong ka Australia bad ka Bilat, ki la batai ïa katei ka jingjia, kum kaba sngewsih.
