Shillong, Naiwieng 05
Ka Mylliem SC ka la jam sha ka kyrdan ba-ar ha ka lympung ïalehkai First Division Football League 2024 ba la pynïaid da ka Shillong Sports Association hadien ba ka lah ban pynliem ïa ka Lawsohtun SC da 2-1 kol ha ka Sngi Ba-ar ha First Ground kaba ha Polo.
Kane ka nam jop ka la wan urlong lyngba u Janhameshwa Marngar na ka bynta ban pynlong ïa ka Mylliem ban kamai 9 point bad ka duna sa tang 1 point ïa ka Mawtawar kaba dang lam-khmat ha kane ka lympung.
Ha kane ka jingïakhun ka Mylliem ka la lah ban ïalehkai bha naduh kaba sdang ha kaba ka la ïoh ban pynkhih jar nyngkong eh lyngba u Janhameshwa ha ka mint kaba 15. Une u rangïalehkai u la pynbud biang ïa ka kol kaba ar ha ka minit kaba 39 na ka bynta ban tam da 2-0 kol ha ka kylla step.
Hadien katto-katne por ba la bteng ïa ka jingïakhun jong ka kylla miet, ka Lawsohtun ka la lah ban pynphai kylla shi kol lyngba u Blashan Nongkynrih ha ka minit kaba 65. Kane ka kynhun kam shym la lah ban thep kol shuh bad ha kaba kut ka la mad ïa ka jingshah rem kaba ar bad ïai sah 4 point na ki saw sien ïakhun.
Haba phai sha kawei paw ka jingïakhun, ka Nongrah SC bad ka Mawkhar SC ki la ïasam mar shi point hadien ba ki la ïakhaid mar 2-2 kol.
Tang mar ïasdang ka jingïalehkai ka Mawkhar ka la pynkhih jar nyngkong eh lyngba u Verjelous Shylla ha ka minit kaba 5, hynrei ka Nongrah ka la lah ban pynphai kylla lyngba u Ksanbor Mawlong ha ka minit kaba 23.
Hadien shiteng kynta ka Mawkhar ka la thep biang ïa ka kol kaba ar lyngba u Ksanbor Mawlong ha ka minit kaba 23 bad hashwa ban kut ka jingïakhun jong ka kylla step ka Nongrah ka la lah ban pynïakhaid kylla lyngba u Evening Tariang (42).
Kane ka lympung kan bteng biang ha ka sngi Palei ha kaba ka Pohkseh SC kan ïakynduh pyrshah ïa ka Umphyrnai SC ha ka por 11:30 mynstep.
Ka jingïalehkai jong ka Shillong Premier League 2024 kan long ha ka sngi Balang hapdeng ka Shillong Lajong FC pyrshah ïa ka lahduh jong ka aïom ba la lah, ka Mawlai SC ha ka por 5 baje janmiet.
