Shillong, Naiwieng 06
Ki kynhun kiba khlaiñ bor na Europe kum ka Real Madrid bad ka Manchester City ki la mad ïa ka jingshah rem ha ka lympung ïalehkai Champions League ha ka Sngi Balang.
Ka Madrid, kaba la bat ïa ka nam lahduh ha aïom ba la dep, ka la mad ïa ka jingshah rem ha la ïing da 3-1 kol ha ka AC Milan, katba u Erling Haaland, u la pynlehnohei ïa ka penalty kaba u la ïoh bad pynlong ïa ka City ban shah rem noh da 4-1 kol ha ka Sporting Lisbon, ha kaba u coach jong ka, un sa shimti noh ïa ka Manchester United.
Ka la long ka janmiet kaba kham bha shibun na ka bynta ka Liverpool, namar ba u Luis Diaz u la ïoh ïa ka hat-trick bad u Cody Gakpo u la ïoh sa kawei ka kol ha ka jingïakhun kaba la jop da 4-0 ïa ka lahduh na Germany ka Bayer Leverkusen ha Anfield kaba la pynpulom ïa ka jingwanphai biang jong u Xabi Alonso sha la ka ïing barim jong u.
La pdiang sngewbha ïa u coach ka Leverkusen ha ka jingwanphai jong u sha kane ka klob ha kaba u la kylla long u nongkyrshan ba sngewtynnad bha kum u nongïalehkai ha ki san samoi hapdeng u snem 2004-09. U Alonso u la lah ban pynurlong jingjop ha ka Champions League bad ka Liverpool ha u snem 2005.
Ka Liverpool da kane ka jingjop ka la kiew sha ka kyrdan ba ha khlieh duh da kaba kamai 12 point ha katei ka lympung ha kaba ka la jop baroh saw sien, bud sa ka Sporting bad ka Monaco kiba don mar 10 point hadien ba ki la jop lai sien bad ïakhaid shi sien. Hapoh ka rukom ïalehkai thymmai jong ki 36 tylli ki kynhun ba la pynrung da ka UEFA mynta ka samoi, ki 8 tylli ki kynhun kiba don ha khlieh duh kin ïoh rung sha kawei pat ka wat jingïakhun, katba khyndai na ki 24 tylli kin rung sha ka ‘playoff’, katba ki 12 tylli kiba don sha trai duh kin shah weng noh.
Haba phai sha ka Sporting, la ong shwa ka jingïalehkai ki nongkyrshan jong kane ka klob ki la ai khublei ïa u Ruben Amorim ha ka jingïalehkai ba khatduh jong u ha la ïing shwa ba un shimti ïa ka Manchester United.
