Shillong, Naiwieng 06
Da kaba shim khia bha ïa ka jingleh jong ka Mizoram Football Association ban khang ïa 25 ngut ki rangïalehkai na ki kam ïalehkai phutbol ha katei ka jylla, ka Meghalaya Football Association (MFA) ha ka Sngi Balang ka la shim ïa ka rai ba kan ïeng ha ka liang para synjuk bad kan khanglad ïa kitei kijuh ki rangïalehkai ba kin ïalehkai ha kane ka Jylla.
Ka Mizoram FA ka la pynlong ïa ka jingtohkit da ka jingkyrshan bad jingïatreilang na ki bor jong ka aiñ, kaba la pynlong ïa ka ban lap ïa ki kam bamsap ha ka dur jong ka jingpynkylla ïa ka jingïalehkai. Kane ka la pynlong ïa ka Mizoram ban khang ïa ki 25 ngut ki nongïalehkai, lai ngut ki ‘official’ bad lai tylli ki klob na ki kam ba ïadei bad ka phutbol na ka bynta shi snem haduh ka jingim.
Ka Meghalaya FA kaba don jingmut haduh katno ka jingshukor kaba buh jingma ïa ka jingïalehkai, ka la rai ha ka jingïalang ha ka Sngi Balang na ka bynta ban burom ïa ka rai jong ka Mizoram FA bad ban pynthikna ban ym don uwei ruh na ki nongïalehkai ba shah pynjari (sanction) uba lah ban ïalehkai ha kano-kano ka lympung jong ka synjuk ïalehkai kiba la pynïasoh bad ka Meghalaya FA.
La ban kdew ba kat kum ki kaiphod kiba la paw ha ki lad pathai khubor, la don katto-katne ngut na ki nongïalehkai kiba la shah khang, ki dei kiba don bynta lane kiba la don bynta ha ki por ba la dep, bad ki klob jong ka Jylla.
Kumta ka Meghalaya FA ka kyrmen skhem ba kan phah ïa ka jingmaham kaba tyngeh sha ki nongïalehkai ba kim dei ban shah pynshoi ban ngop ha kum kine ki kam be-aiñ namar kin buh ïa ka jingim bad ka nam jong ki ha ka jingma bad pynjah burom ïa ka jingïalehkai kaba itynnad.
