Ex. Rev. K. Langrin
Ki samla ki dei kiba dang khie dang san, kiba dang leh shongshit bad tare ruma ïa kano kano kaba ki ïohi, ïohsngew, bad shu bna na ki paralok. Kumta, haba ki leh khlem pyrkhat ïa kano kano ka kam teng-teng bad bunsien ki bakla bad poi sha ka jingbabe. Ki leh ïa kano-kano ka kam da kaba shu bud tynneng bad ïa bud paralok. Kumta, dei ban don ki riew samla kiba pdiang ïa ki jinghikai ki riew tymmen kiba la iohi nyngkong ïa ka sngi u bnai bunsien kin poi sha ka thong jong ka jingim kaba bha bad ba jop. Hynrei ki samla kiba rkhie beiñ ïa ki jinghikai ki tymmen kin poi sha ka jah burom, jingjot bad jingbabe ha ki sngi jong ka jinglong tymmen jong ki.
Kum uwei na ki riew tymmen, nga kwah ban pashat lem lyngba kane ka jingthoh ïa phi ki khun samla kumno ba phi dei ban ïaid, ban leh bad ban im ha ka por ba phi dang samla. Kita ki long :-
(1) Wat kyrkieh ban beh sha ka jingshongkurim :- Don bun ki khun samla kiba shong kurim khlem pat biang karta bad dang lung ka jingmut jingpyrkhat. Kiba kum kita ki khun samla ha kaba kut kin ngat ha ki shibun ki jingeh bad kin babe sah baroh shirta jong ka jingim jong ki. Ko ki khun samla ka ri jongngi, ban poi sha ka jingshongkurim phi dei ban tip ïa kino ki mawjam ba phi dei ban jam. Kine ki long ba nga kwah ban ai jingmut ïa phi (i) U Mawjam ba nyngkong u long ka jingnang jingstad : Ko khun samla, hato ka jingnang jingstad jong phi ka la biang ? Lada phim pat ioh ïa ka jingnang jingstad, wat pat kyrtiang sha kadiang kamon, hynrei to minot thop ha ka jingpule jong phi khnang ba phin ioh ïa ka jingnang jingstad kaba biang. (ii) U Mawjam uba ar u long ka kam ka jam : Ko khun samla, hato phi la don ha ka kam ? Hato kata ka kam jong phi ka la biang ïa phi ban phin pynlong ïa ka ïing ba suk ba saiñ ? Hato ki khun jong phi kin biang ynda kin leit pule ? To phin ïoh shuwa ïa ka kam kaba ki tymmen kin da i hun. Lada phim pat biang wat ïa bud tynneng ïa kiwei ban shongkurim kloi.
(iii) U Mawjam uba lai u long ka jingïaieit kaba skhem :- Ko khun samla, wat beh kyrkieh sha ka jingshongkurim lada ka jingïaieit jong phi kam pat skhem. Don bun ki samla kiba kyrkieh ban shongkurim kiba ïa shong tang khyndiat snem, hadien pat ki ïaphet noh bad poi sha ka jingïapyllait san shyieng. Ka daw ka long ba ki ïa poi-kha khlem pat skhem ka jingïaieit. Ko khun samla, to da pyrkhat bha bad saiñdur ïa kane ba ha shuwa ba phin poi sha u mawjam uba saw uba long ka jingshongkurim, phi dei ban da ïaid ïa kitei ki lai tylli ki mawjam, te ka la biang ïa phi ba phin jam noh saïa u mawjam uba saw uba long ka jingshongkurim.
(2) Wat ïa beh than ïa ka spah ba shu ïoh ei khlem da trei shitom :- Don bun ki khun samla jong ngi kiba la thaw ïa ki seng bapher bapher. Ka jingthmu jong ki ka long ban pynbha ïa ka ri bad ka jaitbynriew, ban ïada ïa ka khyndew ka shyiap, ban pynneh pynsah ïa ki riti dustur bad kumta ter ter. Pynban don bun ki khun samla kiba rung sha kine ki seng tang ban lum spah. Don ki samla kiba khlem don kano kano ka kam ban trei, hynrei ka pisa pat kim ju kyrduh. Namar ba ki don ha ki seng ba ki ïa thaw da ka jingsoh lang jong ki para samla. Nga kum u riew tymmen te ngam sngewthuh shuh nangno ki khun samla kiba khlem kam khlem jam ki ïohi pisa kham bun ban ïa kito kiba trei kam. Nga ïohi ba ka jingïoh pisa jong ki khun samla kiba khlem kam ka long ka jingpynjot ïa ka jingim jong ki hi. Ko khun samla, to kynmaw ïa kato ka jingïathuhkhana shaphang kaba beh ‘kaiñ stem. To kynmaw ruh ïa ka jingong jong ki riewstad. ‘Easy come, easy go,’ kaba mut ka pisa kaba wan rung kloi ha ka pla kan mih ruh kloi na ka pla. To kynmaw ruh ba ka pisa kaba wan hap kum u ‘lappraw kan rngat kloi kum ka umsaw. Phi lah ban tei ïing tei sem, ban thied kali da ka pisa ba phi ïoh ei. Ym don ba kylli ïa phi, nangno phi ïoh pisa ? Lehse don kiba ïaroh ïa phi ba phi ïoh pisa khlem trei. Hynrei to kynmaw ho ! ba ha ki sngi jong ka jinglong tymmen jong phi, kato ka pisa ba phi ïoh ei kan sa khyrwait kylla ïa phi. Bad shuwa ban phin ïap, ka mynsiem jong phi kan pisa kan lynga. Ko khun samla, nga kwah ban pyni lem ïa phi ba ka pisa ba phi ïoh da kaba phi pynmih umsyep bad trei shitom kan neh kham slem bad ïa ka pisa ba phi shu ïoh ei khlem trei. Sa wad hi ma phi ïa ka daw balei ka long kumta.
(3) Wat kwah kiew class khlem da pass bha :- Ko khun samla, kiba dang leit skul, wat kwah kiew class khlem da sngewthuh, khlem da pass bha ïa ka examination. Don bun ki samla kiba dang leit skul, kim ju pynshitom ïalade ha kaba pule minot. Kim pat ïoh ïa ka jingsngewthuh kaba biang, pynban ki kwah ban kiew class thymmai noh. Kumta ki thaw bun ki buit tang kumno ba kin ïoh kiew class. Kumta ngi ju lap ba ki don ki samla kiba peit kot tuh, kiba shu pan jingïarap na ki paralok bad kiba pyndonkam da ki mobile ha ka por exam. Ha ki skul ha nongkyndong, khamtam ki samla kiba dang hapoh ïa ka Class – IX, ki phah leit kyrpad ha ki kmie ki kpa ba ki nonghikai kin pynkiew class thymmai wat haba ki pheil ha ka exam. Ki kmie ki kpa ruh namar ka jingbieit bad jingbym sngewthuh kin shu leit kyrpad ïa ki nonghikai ba ki dei ban shah ïa ki khun jong ki kiba khlem pass ha ka exam ba kin kiew class thymmai. Ki nonghikai ruh namar ba ki sheptieng ba ïoh ka enrolment ha ka skul kan duna noh, bym banse kin shu kohnguh ïa ki kmie ki kpa jong ki khynnah. Kumta ynda la plie skul ki khynnah samla kiba pheil kin ioh ban shong class thymmai. Ko khun samla, wat leh kumta, to kiar raidieng raimaw na kaba kiew class khlem sngewthuh namar ka long ka bih ïa phi. Ha ka jaka ba phin ioh ïa ka jingstad, phin ioh pynban ïa ka jingbieit. Kumta, haba phi leit skul, to da minot, da trei shitom bad shim ïa ka jingong ‘Haba kiwei ki lah, balei nga ngam lah ?” Haba tang ban kheiñ sien (multiply) bad phiah (divide) phim pat nang, wat kwah ban kiew class thymmai. Ban ïa kaba phin ïaleh 10 bad 15 snem ïa ka class W – C ka bha ba phin shong bun snem ïa ki class ba kham hapoh. Wat im tang ka duwai blei khlem pynshitom ïalade. U Blei U ïarap tang ïa kiba ïarap ïalade (kiba pynshitom ïalade). Kynmaw ïa ka jingong. “God helps those who help themselves” kumno phin hikai ïa ki khun jong phi lada ïalade phim pynmlien ban trei shitom.
