Shillong, Naiwieng 06
Kan long ka sngi kaba biang eh ïa ki nongkawang bol na ka bynta ban ïoh pynhap 16 wiket ha ka sngi nyngkong jong ka Ranji Trophy 2024-25 Elite Group-A hapdeng ka Megha -laya bad ka Jammu & Kashmir ha madan ïalehkai kriket jong ka MCA ha Polo, ha kaba ka J&K ka dang tam da 52 ron.
Ha kane ka sngi ka J&K ka la ïoh 125/6 hadien ba ki nongkawang bol ki la lah ban pynkhyllem ïa ka Meghalaya na ka bynta 73 run.
Ka J&K kaba la jop ïa ka kynting pisa bad da kaba kyrmen ban ïalehkai bha ha ka liang kawang bol. Hynrei ki nongtied ka Meghalaya ki la pyrshang ban ïalehkai bha ha kaba u Bamanbha Shangpliang bad u Arpit Bhatewara ki la ïalehkai bha ryngkat ka jingïaishah bad ka jingtbit ban tied ïa ka kynta kaba nyngkong.
Kine ar ngut ki la lah ban tied 53 ron shwa ba ka liang pyrshah kan lah ban pynhap napdeng uwei na kine nongtied, ha kaba u Bamanbha u la shah pynkhyllem noh ha u Abid Mushtaq na ka bynta 21 ron.
U Abid u la pynhap wiket ruh ïa u Arpit na ka bynta 24 ron kaba pynlong ïa ka Meghalaya ban duh noh ïa ki nongtied kiba kynsai bad shah pynkhyllem haduh 10 wiket na ka bynta 20 ron. U Abid u la pyndep da 5/19 bad u nongkawang bol ba kynsai u Auqib Nabi u la ïoh ban shim 5/9.
Ka jinglah ban kawang bol ka la nang ïai bteng, ha kaba u nongkawang bol ba lamkhmat ka Meghalaya u Akash Kumar Choudhary u la ïoh lai wiket (3/39 ha ki 15 over). Wat hapdeng kane, ka J&K ka la lah ban ïalehkai bha pynbha pyrshah ïa ka Meghalaya ha kaba kut jong ka jingïalehkai kaba ar.
Ka Meghalaya ka la bteng ban ïakhun tyngeh ha ka liang kawang bol, ha kaba ka la ïoh sa lai wiket lyngba u Ram Gurung (1/13 ha ki 4 over), Dippu Sangma (1/49 ha ki 11 over) bad u Aryan Borah (1/20 ha ki 6 over.
U Abdul Samad u dei nongtied ba tbit ka J&K, u la khyrwit da ki ‘six’ na ka bynta ban kamai 34 run na ki 34 bol ha shwa ba un shah pynkhyllem ha u Dippu.
Kumta ka Meghalaya ka la khmih lynti ban ïalehkai bha lyngba kiwei pat ki nongtied ha ka sngi kaba bud khnang ban khanglad ïa ka J&K ban kynjoh sha ka thong.
