Kum ki briew ngi don la ka jong ki kam ki jam hangne na sla pyrthei. Don kiba im ka rep lyngkha, don kiba im tih maw tih shyiap, don kiba im bylla kit nong, don kiba seng kam khaïi mar bam mar dih, don kiba im die dukan jaiñ, dukan die jhur bad kiwei kiwei.
Don kiba im ka tong dohkha na ki wah bad ki du-riaw bah. Don kiba im ja da kaba hikai pynnang pynstad ïa ki para briew lyngba ki skul pule. Don kiba im ka kam ïalap niam ban pynphriang ïa ki khubor ba bha sha ki para briew. Don kiba im ka kam ñiah kali kamai bad kiwei kiwei. Hynrei baroh na kine ym don ba lah ban pynjlan ïa ka rta la jong. Haba la ring sti bad la noh ka met baroh ngi hap ban ap ïa ka sngi ka jingïap ka ban rat naphang lin ïa ngi ki briew.
U nongrep bad u nongïalap niam kim don jingïapher haba la tymmen ki hap ban ïa kynduh bun ki jingeh bad ka jingdiaw ha ka mynsiem. Namar ym don u briew uba lah ban pynjlan ïa la ka jong ka rta.
Ka jingim jong phi ki briew ka shong ha ki ksangkti u nongthaw nongpynlong ïa ngi ki briew bad ïa kiei kiei kiba don hangne ha sla pyrthei. Ym don ba don spah bad ym don nongïalap niam ba khraw katno katno kiba lah ban pynjlan ïa ka jong ka karta. Namar kum ki briew ngim lah ban pynjlan ïa la ka jong ka rta na kane ka pyrthei shong basa.
C. B. Iawphniaw
