ki symboh – ki symbai – KTIEN
“kA KYRSAN – kA KYRBAH
Ka long ka jingsngewtynnad bad sarong ba kum ka Jaitbynriew khara – nylla jong ngi ban ai iohi bad ban tih ïa ka pliah ding jingshai syrdeng ba la tyngkai – tyngkhip ban ïa ngam pynleit jingmut, aiu kane ka leh rukom ba la ïai sah syllai bad ngi, ka ktik shem jingsngew ïa ngi. To ngin shu ïa ngam suh khlieh ïa ki symboh, symbai ktien bad kyntien, kiba tei kylla pat la ka ktien I mei la – jong, ban ym shah liem.
Kumba nga la thoh mynshuwa ïa ka jingpyndep leh rukom jong ‘Ka Suit – ka Shor’ kaba la plie phang ïa ki 5 (san) sngi jingleh rukom, uei pat u soh iohnong ai jingtip ban nang pynïar ïa ka stad pynnang ha ka ban sei, pynneh kiew phrang ïa ka ktien I mei la jong.
Mynta to ngin ïa pyrkhat pynshong ïa kum kine ki symboh ktien – ‘ka Kyr- san – ka Kyrbah kaba la Leh – Rukom jong ‘ka Suit – ka Shor’ – ka lam khmat kumba la ju don bad kaba da buh pynshong ban ïa hap dur, hap – sur, naduh ki shiphew ksing la 21 (Arphewwei) skit’ singniam kumba la pynkup pynspain ban eh ki ‘mat – ki pung, ban phuh ka lyngkor lur jong ka Sain Riti Synshar Syiem Khasi, na la ka mei – ri – lung Ri san ïa ngi. Ngin da ia ap kyrmen hi ruh ha ka pyrkhat pynshong jong ka stad – pynnang ba mynta, ban tan da ioh thliew khyrwait shabi, ban shai ka byrngut – byrnget shahtyllep.
Ki ar symboh ktien jong ‘ka kyrsan – kyrbah’ ki kdew iohi da mut ïa nga, ïa ki jingmaïan – maiot jong ka jingsngewthuh ‘Long – Blei,’ ki longsuwa, longbteng, naduh ba la wan kiew ha Ryngngi u Syntai – Shu – Long (Shillong) ban teh song ïa ki longdong, long shnong, long Raid sha ka long Hima Syiem Khasi ban da jiar – da – pjiar ïa baroh ka ban wit kaba thar, ka ban sah kyndong – shah kdong. Kumta, ka shong ha nga ha phi, bad ki samla pule ba la nang ioh jingtbit, ban da sngewkiew jingthrang dik – dik ban pynïar pynpiar jongthoh, ha ki shuid bad ki snuid jong la ka ktien khasi ba la hara, bad don la tih ka jingshai shem sngewthuh kaba hok bad ba shisha.
Kumta, to ngin ïa shim shuwa ïa ka ktien – ‘Kyrsan’ kaba dei ïajan bad ka ‘ksan,’ katba ki jingmut pat ha nga hi shimet, ki lam kumban ong – ‘Kyr’ ka thew, ban da pynkiew kyrpad – kyrpan, sha la u Nongbuh – Nongpynlong, ïa kino kino ki jingdawa, jingduna kiba la pyrkhat briew ka sngewdei ban kiew ne kyntiew. Kumta keiñ la sngewdei ban ong – U Khasi u don ka saptip ba la ai u Blei najrong bad ka jingïajan jong u ka long u ïeng ha ka par hukum, ban ym thynrei ne kiew Mynsiem long ksuid bym hok, bym khuid, kylluid jingsngew katba mon.
Ka ïit, khmih iohi lyngba – u Khasi u buh u suit ha ka ktien ne ki kyntien jong ka kren – ka khana, kaba ngim poi pyrkhat, lymda ngi ngam pei – ba ne twad da la ka mut – ka pynleit jingmut ba khuid, ba hok bad ba shisha kumta, to ngin ïa saiñ la pyrkhat shongñia, la kumno – kumno ban ym ia lir – thuh – khana kyntei jinglong bym – bha, hynrei ka jingshisha.
Kaba, kum kine ki leh – rukom ki wan, ngi don la ka thong ka kdong ban lum stad – nang, na ka stad – tip, ban da pynïahap dei na ki symboh ktien jong la – i – mei, kumta ki synrop ktien jong ka “Kyrsan – ka Kyrbah,’ ki ïeng ban kdew ïa ka jingmut ba khuid – ba bha, ba sngur jingmut, ba shai irat ka shem thuh pyrkhat, kaba kum u Khasi, bym – thoh bym – pruid, mynnor mynshuwa, hynrei mynta, u la kiew irat ka stad pynnang ngim dei ruh ban shu jnang, sah – ang ha khmat ka long – pyrkhat namar la ka jong ngim lah ei ei, ban shem sngewthuh, pynhap ïadei.
Tang liak kumba thaba kata kaba khuid, sada nga la sngewdei ban ong ba ‘Kyrsan’ – ka thew ka jingkyrsiew – kyntiet bor u Long – Blei ia u khasi, u briew haba u par hukum ban sieh ban sien ha la ka longbriew, ïa ka pynkup bor u Long – Blei kumta ruh la sngewdei ban ong ba ka khana ba la pynkyntang ïa ka ‘Long Kpoh – Longkur’ – jait syiem Shillong ka ioh ïa ka plie lamkhmat jingpyntip rukom, da ka jingpynkitniam – pyni leh rukom, na ka long kpoh, ha ka Longkur bad kiew ka roi – jait – long khong (ka tnat ktien Khasi ba ïar – ba paw). Ha kaba ïadei bad ka kynnoh ktien ‘Kyrbah, ba ïa ïaid bad kyrsan, la sngewdei ban ong ba ka pynmut ne ïa shei jingmut jong kaba la pynkup pynkdup kum ka kular ïa kut jong ka jingdawa na u briew ha ka longbriew, kaba da sien da sngiar ïa ka jingïapan ban da ïahap ïadei dur jong la ka long kpoh, kiew longkur bad shala ka long jait ban ym bakla ne ban khur ïa ka bashla khlem ïadei dur dei sur jong ka longkur, ba la kyntang janai na ka seng, ka pun, ka kha, ka sei, ka aiñ blei ba ka pyrkhat khasi ka pynhap dei.
Shuh – shuh la sngewdei hi ruh ban ong ba ka duwai, ka phirat, ka kyrpad – ka kyrpon ha ka suit – ka shor ka lakam kum ka jingkut khlieh ba kyntang tam, jong ka longdoh, longsnam bad long shyieng na la ka Mei – iawbei bad kiew hi ruh ha ki arphylla ba ïahap dei jong ka kheiñ kur, kheiñ kha u Khasi. Tam ne duna ha kine ne jingbym salia, ka kiew ha ka duh – ka pdam, shah khang kdam ha ka long longbriew, na kata ka longkpoh kiew longkur bad saiar ka long jait. Dei hangne keiñ, ba ka duwai ka ïa pan ba pynskhem ha ki laitdur jong ka pyrkhat khasi – ka Mei – ka ïawbei, u kpa u Thawlang bad u Suidñia ha ka Bor u Longkñi naduh thymmei ka long rympei haduh khmat ka pyrthei, ïa ka bor jong ka longbriew kaba hap don seng ban tei, ban lait na ka kynsha leh jyndei la ka longbriew jingim pyrthei.
Da kumta keiñ la sngewdei ban ong ki symboh ktien jong ka ‘Kyrsan’ ka pher na ‘Ka ksan’ (ïa ka shimet briew) katba ‘kyr’ bad ka thew ïa ka jingmut ba da buh ka jingïadei bymkut, ha kata ka kyrpod – kyrpon ba la ïa skut, bad bad a pynsah kynmaw la jingïapan ban kiew ki jingmut jingthmu bymlahkut – ne ym dkut lym kumta, ki longshuwa ki plie phang phai kynmaw sha la ka kyrpad – kyrpon ban kiew ki jingmut jingthmu bymlahkut – ne ym dkut lym kumta, ki longshuwa ki plie phang phai kynmaw sha la ka kyrpad – kyrpon, ban ym shah rah sha rong sha ki jingkwah – jingthmu briew ki har – jait bun rukom.
Kumta, kum kaba kut, kaba wai, ka pyrkhat khasi ka plie wang la ki syrdeng jingshai kum ka Nuksa ba kyrpang, ban Nongmuna ïa kata ka jingtheh jingshait ym tang ki snuid ki syrdeng kiba ka shat peiba, hynrei ka don ruh la ki thleiw shabi, plie jingshai, ba pynitynnad, sngewtynnat hynrei ban da ai hi ruh ïa ki thliew pyrkhat bad jylliew ban siew ba ka longbriew kan pynsah pynneh riti, dustur ban ym taplup ka kyrtep jingleh pat da kumwei ne la kiew ha kaba ‘Lakhur’ kata kaba leit khur ne leit kyndup ïa ka bym ïahap jingleh, jinglong bad ki sur – ki dur, khlem poi hok – poi – Blei shu jiah rngai suk bad nang kiew ksan ka pyrkhat nongwei. Lada ngin ïa ngam pat ïa ka ktien ‘Kyrbah,’ nga la sngewdei ban noh – tah tang kum kine ki jingsngewthuh – ba ka jingïapan ïa ka bor, ‘U Ba – Lah – ei,’ ka mut ne kdew jingkyrpad kyrpon u briew na u Long Blei’ ha kata ka long kpoh – Longkur, kan da ïadei bad ïahap dur, bad ka pyrkhat khasi ka la saiñ la tiah kum ka Dustur bym don ïapher na ki para longkur longkha Khasi – Khara – tangba, ha kane ka khep – longkpoh jong ka jait Syiem Shillong, ki jingpyndep rukom ki shad tawiar – ha Mei ïawbei, bym tip thymmei, ha u Thawlang, ba la stad – tip hikai pynnang na matti – blei ba la iohi bad ïa tiplang, kum matti – blei ba ai sakhi – u syntai shu long bad ki hyndai umdih – umtong, ki tyllong um ba tuid sawdong.
Kumta, nga la sngewdei ban ïa ai lem shaphi baroh ba u Khasi ha la ka khara longbriew jong u, u don la ka jong ka stad – tip tynria, kaba u Long – Blei u la pynkyntang janai, ha ki symboh ktien bad kyntien kyoh jingong. Kine baroh ki dang sah ha ka dum – ka iongngit, ka bymshai – ka bym tip hynrei ka jingieit u Long – Blei ïa ngi ka long ka jingiai ïa – leh pynsah – pynneh ïa la ka hok – Tynrai Longbriew lajong bad ban da sngew sarong hi ruh ba ngi don ki jingleh pyndep rukom wat ha ka synshar – ka khadar ïa la ki paid lajong bad ki aiñ dustur kiba ngi la ju don, ki dei ban pynkiew kynmaw, ban ïa phaidien ym ban shah pynngop – shah – khlieng Mynsiem, jingsngew ne pynsawa da kumwei pat Sieh – Rong – Kthong.
La sngewdei ruh ban ong – Kyrsan – ka jingiapan ban kiew ksan ha kane ka jing-leh kaba ïadei nyngkong bad ka jaitbynriew katba ka symboh ktien – ‘Kyrbah’- ka kyrkhu U Blei, ba ka longbriew, kumta kan da ioh keiñ ïa ka sap – Blei, lym kumta la thynrei pat da kumwei da leh jingbriew, ban kit ban ym wan siar ka thawjot – thawpra.
Ka Khublei Niam Syiem Hima Khyrim ba suk sha baroh
