Shillong, Naiwieng 07
Ka mynsiem ban ïakhun tyngeh ka la wan mih paw na ka kynhun ïalehkai kriket ka Jylla ha ka sngi ba ar jong ka Ranji Trophy 2024-25 Elite Group-A pyrshah ïa ka Jammu & Kashmir kaba donkam pat mynta sa tang kumba 59 ron ban jop.
Hadien ba la shah pynkhyllem lut baroh wiket tang 73 ron ha ka pali ba nyngkong, haba wan ban tied ïa ka pali ba ar, ki nongtied ka Meghalaya ki la lah ban kham ïalehkai bha tat haduh ba kin da kamai 195 ron bad ban pynlong ïa ka J&K ba kan donkam 75 ron ban jop ha kane ka jingïakhun.
Haba sdang jong ka sngi, ka J&K kaba la wan ban bteng na ka 125/6 ki la hap lut baroh ki wiket hadien ba ki la lah ban kamai 194 ron. Hangne u Aaryan Borah marwei u la ïoh haduh 5wiket bad ai 42 run, kaba dei ka sien ba lai ban lah shim san wiket ha kane ka kyrdan ïakhun jong ka Ranji Trophy.
Kane ka la pynlong ïa ka J&K ba kan tam kylla da 121 ron, kaba hangne la shem bad ïohi ïa ka syrwet jong ka jingïakhun na ki nongtied ka Meghalaya, kaba khyndiat ki la ïoh ïa ka jingïarap na ka jinglong ka madan kaba la kham ailad ïa ki ban lah kamai ïa ki ron lada ïa nujor bad hynnin ka sngi ba nyngkong.
Ha kane ka pali u Arpit Bhatewara u la lah ban kamai 74 ron ba la wan na ki 129 tylli ki bol, ïa kaba la ïarap ban kyrshan ïa u na sha shilliang da u Sumit Kumar uba la lah ban kamai 36 ron na ki 43 tylli ki bol. Kine baroh ar ngut ki la lah ban seng ïa ka nongrim kamai ron kaba long 55 ron na ka bynta ka wiket kaba san. Hadien kane u Arpit u la bteng ban ïoh shuh shuh ïa ka jingkyrshan na u Roshan Warbah uba dang ïoh ban ïalehkai nyngkong ha kane ka lympung hadien ba u la lah ban kamai 14 ron bad u Ram Gurung 10 ron.
Hadien ba la sah sa tang kumba katto katne ki over, ka J&K ki la ïakhun tyngeh ban ym hap shuh ki wiket kam pher wat haba ki la thrang ban kynjoh noh ïa kane ka 75 ron kaba dang sah tang hynne hi ka sngi, ïa kaba ki sngewthuh ban ïa kaba ngat ha ka jingeh kham bha ban ïakhun suki-suki bad ban ïai ap pat tat haduh ka sngi kaba bud.
Da kumta haba kut ka sngi, ka J&K ka la lah ban kamai 16 ron hadien ba ka la hap noh shi wiket.
