Shillong, Naiwieng 10
Ka East Khasi Hills ka la long ka lahduh ne Overall Champion ha ka liang ki shynrang bad kynthei jong ka 30th State Karate Cham -pionship 2024 kaba la poi sha kaba kut ha ka Sngi Saitjaiñ, katba ka Eastern West Khasi Hills ka la wan ha ka kyrdan ba-ar ha ka liang ki shynrang bad ka Ri-Bhoi ha ka liang ki kynthei.
Ïa kane ka lympung ïalehkai kaba lai sngi kynthih kaba la long ha JN Indoor Stadium kaba ha Polo, la pynïaid da ka All Meghalaya Karate-Do Association ha ryngkat ka jingkyrshan lang da ka tnat ïalehkai jong ka Sorkar Jylla
Ha kane ka lympung ïalehkai manla u snem la wan shim bynta da 456 ngut ki khynnah ïalehkai karate naduh kiba 6 snem shaneng ha baroh ar ki jingïalehkai kumite (sparring) bad kata (demonstration). Ka jingthmu jong kane ka lympung ka long ban jied ïa ki nongïalehkai ki ban mihkhmat ïa ka Jylla ha ki lympung ïalehkai shabar jylla bad kumjuh sha ka Meghalaya Games ka ban sa long ha u snem thymmai ha West Jaiñtia Hills.
Ha katei ka sngi la ïadon lang u MP na Shillong Dr. Ricky A.J Syngkon kum u kongsan ha ka jingïadonlang ruh u Working President ka Meghalaya State Olympic Association u Bah John F. Kharshiing bad kiwei ki riew rangbah.
La pynbyrngia ïa ki da ka jingïalehkai kiba itynnad lyngba ka kumite bad kumjuh ïa ka jingpyni kaba phylla ha ka ‘kata’ jong ka kynhun. Kumba ka long mynta u snem kane ka jingïalehkai ka la nangkiew shaphrang lyngba ki sap ba kyrpang jong ki khynnah.
Bun na kito kiba la ju ïashim bynta ha ki jingïakhun ba la dep jong kane ka lympung, mynta ki long hi ki nongpynïaid bad ki nonghikai, da kaba ïarap ban thaw ïa ka lynti pynmih ïa ki sap ïalehkai karate kiba dei ban pynlong ïa ka Meghalaya ban ïakhun bad kiwei pat ki ri ha ki snem ban wan.
Lait na ki khusnam kynhun ba la sam da u Bah Syngkon, kiwei kiba la sam ki long ruh na ka bynta ka khusnam Best Karateka da u Bah Kharshiing. Kine ki jingpynkup burom ki leit sha u Fadrick Wanñiang (junior boys), Paul Danny Kharmu -dai (senior men), Audrella C Marbaniang (junior girls) bad ka Carene Sohïong (senior women). Ka Carene ka la mihkhmat ïa ka Ri-Bhoi katba ki lai ngut kiwei pat ki la ïakhun na ka bynta ka East Khasi Hills.
Kum ban shu pynkynmaw ïa kane ka lympung la sdang naduh ka Sngi Palei ha kaba la plie da u Deputy Chief Executive Member jong ka KHADC u Bah Pynshngaiñ N. Syiem, ha ka jingïadon lang u General Secretary ka MSOA u Bah Finely L Pariat lem bad u Joint Secretary ka MSOA u Bah P Laloo.
