Shillong, Naiwieng 11
Ka prokram wad khynnah ïalehkai jong ka wat kaba lai ïa kaba la tip kum ka Talent Identification program (TID-3) ka la nangjam shaphrang ha baroh ki khadar tylli ki district jong ka Jylla.
Ïa kane ka prokram kaba la plie da u Myntri Rangbah ka Jylla u Conrad K. Sangma lem bad u Myntri ka tnat ïalehkai u Bah Shakliar Warjri myn ha ka 14 tarik u Lber, la kyrshan da ka tnat ïalehkai, bad ba la pyntyllun da ka Meghalaya State Olympic Association ban test haduh shiphew hajar ngut ki khynnah kiba don ka sap kilan met naduh ka rta kaba 6 haduh 15 snem hapoh ka jingkhmih u Ian Campbell, Director ka Global Head, Sportality, Australia/India.
Kane ka kynhun (testing team) kaba la khmih ban pynïaid da ki nongïalehkai barim ha ka Olym-pic ha ka jingïatreilang bad ka MSOA bad Sportality kaba la ïalam da u Bah Dipshon Ryn-tathiang, Chair-man ka MSOA Podium Finish Committee, bad u Bah John F. Kharshiing, Working President ka MSOA, ka la sdang ha ka 21 tarik u Risaw mynta u snem na Shillong (East Khasi Hills) ha kaba la bteng sha Khliehriat (East Jaiñtia Hills), kumjuh sha Jowai (West Jaiñtia Hills), Nongstoiñ (West Khasi Hills), Mairang (Eastern West Khasi Hills), Bhoirymbong & Nongpoh (Ri Bhoi District), bad la hiar sa sha lum Garo ha ka 4 tarik mynta u bnai ha kaba la sdang ban bishar bniah ïa ki khynnah ha Tura, kumjuh ha Trikikila (West Garo Hills ), bad ha ka 6 tarik ha Ampati (South West Garo Hills).
Na ki shiphew hajar ngut kiba la shah test, 2589 ngut ki dei na ki football grassroots centers katba kumba 3652 ngut ki khynnah ki dei na ki skul bapher bapher baroh lang ka long 6241 ngut kiba la dep shah test lyngba ki kor ki bor jong ka juk stad. La test kumba 350 haduh 400 ngut ha ka shi sngi ha ki District bapher bapher.
Kane ka Talent Identification Program ka dei na ka bynta ki jingïalehkai bapher bapher bad ka long lehse ka sien kaba nyngkong ha ri India ba ka jylla Meghalaya ka pynlong ïa kum kane ka rukom wad ïa ki sap ba kyrpang.
Ka kynhun testing na ka MSOA ha kane ka kynti ki la nanglap shuh shuh ki khynnah kiba don ïa ki sap kyrpang ha ki districts bapher bapher jong ka Jylla ha kaba ki 15 bad 16 snem ki khynnah shynrang na Ampati ki la mareh 5.7 sekhon, 6.02 sekhon ha ka Test Compass Drill kaba long kham sted ban ïa ka ‘international benchmark’ kaba 8.00 sekhon ïa ki shynrang bad kiba la mareh (sprint) 20 Mitar hapoh 3.06 sekhon bad 2.85 sekhon, katba ka ‘international benchmark’ ka long 3.00 sekhon na ka bynta ki shynrang. Kumjuh la shem bun ki sap kyrpang jong ki samla kiba ïaryngkat bad ki sap ki jingthew ‘international bench’ ha kiba bun ki district jong ka Kylla.
Lah ban pynpaw hangne ba ki khadwei ngut ki khynnah na ka TID phase -1 bad Elite Pathway Program (EPP)-1 kiba don mynta hapoh ka program Super Elite Pathway Program (SEPP-1) ki la pynpaw ïa la ki sap jong ki ha ki jingïalehkai bapher bapher bad ki dangïai bteng ki jingshah hikai hapoh ka jingkhmih ki riew shemphang bad ha kitei ki nongïalehkai barim jong ka Olympic.
Namar ki examin hapoh ki skul ki ban long shen, ka MSOA ka la pynsangeh shwa ïa katei ka prokram sha Garo Hills bad kan sdang biang ha u taïew ba nyngkong jong u Nohprah mynta u snem.
