Shillong, Naiwieng 12
Ka Meghalaya Cricket Association (MCA) ka dap da ka jingkmen bad ka jingsngew sarong ban pynbna ba ka Debasmita Dutta kaba dei ka kapten jong ka kynhun ïalehkai (senior) jong ki kynthei ka jylla ka la shah jied ban mihkhmat ïa ka kynhun ïalehkai jong ka India C ha ka lympung ïalehkai Senior Women’s T20 Challenger Trophy ka ban sa long shen.
Kane ka lympung ïalehkai jong ka BCCI kan long ha Ranchi, Jharkhand, naduh ka 17 Naiwieng.
Ka Debasmita ka dei ka nongshong shnong jong ka Rynjah kaba don ha Shillong bad ka ju ïalehkai kriket naduh ba ka dang rit. Ha katei ka por ka Meghalaya kam pat dei ka dkhot ba pura jong ka BCCI, tangba ynda ka la leit sha Bengaluru na ka bynta ka jingpule ka la long kaba don sap haduh ba kan da shah jied ha ka kynhun ïalehkai jong ka Karnataka Junior.
Ka Debasmita kaba lah ban lehkai kum ka nongtied bad kawang bol ruh, ka la wanphai biang sha Meghalaya ha ka por ba ka BCCI ka la ai ïa ka kyrdan dkhot ba pura ïa ka synjuk jong ka jylla. Ïa mynta ka dei kawei na ki nongïalehkai ba la kham rangbah bha kaba kiwei ki peit sha ka bad kane ka jingjop kan ai mynsiem shuh shuh ïa ka Meghalaya khamtam na ka bynta ki nongïalehkai kriket kynthei.
Dang shen, ka la shah jied kum ka Player of the Tournament ha ka lympung ïalehkai jong ka NECDC 1st Senior Women’s Interstate Friendship T20 Tournament ha Nongkhrah, Ri-Bhoi, bad la pynkup burom ruh ïa ka ha ka miet sam khusnam jong ka North East Cricket Development Council (NECDC) ha u bnai Jylliew.
Haba phai sha ka lawei, ka Debasmita ka la pyndep ruh ïa ka Level A coaching course na ka National Cricket Academy jong ka Bengalore. Wat la ka la leit sha katto-katne ki camp jong ka ri, hynrei kam pat ju lah ban kiew sha ka kyrdan kaba ha khlieh duh. Ha ka samoi ïalehkai ba la dep, ka Ajima Sangma kum ka ‘thei ïalehkai ka Meghalaya ka la shah jied ha ka kynhun ïalehkai jong ka India A hynrei kam shym la ïalehkai satia.
Kumta ki kyrwoh na ka liang ki dkhot jong ka NECDC, ki nongïalehkai barim, ki coach, ki nongïalehkai ba mynta bad ki riewieit kriket ki la tuid ban ai khublei ïa ka Debasmita halor kane ka jingjop.
U President ka MCA u Nababrata Bhattacharjee u la pynpaw ka jingsngewkmen haduh katta-katta ïa ka jingshah jied jong ka bad u kyrmen ruh ba kan ïoh jaka ha ka kynhun ka ri India lane ha ka Women’s Premier League franchise.
Kumjuh, u Secretary ka MCA u Gideon Kharkongor uba la ïohi ïa ka Debasmita ba ka kiew bha kum ka nongïalehkai kriket naduh ki sngi ba ka dang sdang ha ka Shillong Cricket Academy, u la ong ba ka dei hok ban shah jied katkum ka jingshakri ba la slem bha jong ka ïa ka jingïalehkai kaba ka ieid eh. “Ka jinglong bym ju ailad jong ka ka long kaba dei ban sngewnguh bad ka lad jong ka ban ïalehkai ha ka Challenger Trophy kan plie lad ïa ka ban ïalehkai ha ka kynhun ba kongsan jong ka India bad bun ki samla kin ïoh mynsiem,” u la bynrap.
