Imphal, Naiwieng:
Ka kynhun kaba heh jong ki nongïakhih Kuki-Zo ka la pyndap ïa ki surok jong ka Gamgiphai ha ka Sngi Ba-ar, da kaba pynpaw ïa ka jingbitar bad jingsngewsih kaba jur halor ka ‘jingshah pynïap briew’ kaba dang shen ha Jiribam ha kaba la kynnoh ba la leh da ki pulit CRPF.
Kum shi bynta ban pynjur ïa ka jingïakhih, ki la don da ki hajar ngut ki nongïakhih kiba la ïalum hapoh ka lama jong ka Committee on Tribal Unity (CoTU) Sadar Hills, da kaba pyrta, “CRPF Down Down,” “Ngi kwah ïa ka hok,” bad “Ngi dei ki nong India, ym ki lehnoh,” katba ki dang dawa ïa ka jingkitkhlieh bad ban pynkut noh ïa kaei kaba ki khot ka jingleh donbor ba la thmu pyrshah ïa ka imlang-sahlang jong ki.
Katba ka jingïakhih jong ki Kuki-Zo ka dang ïai bteng ha Gamgiphai, la ïoh khubor sa kawei pat ka jinghiar thma ïa ka shnong Zairawn ha Jiribam da ka kynhun Meitei kaba kieng atiar.
Ka shnong Zairawn ka la shah thombor nyngkong eh ha ka janmiet jong ka 7 tarik, Naiwieng, kaba la pynlong ïa uwei u nonghikai skul uba 31 snem ka rta ba un ïap.
Ki la pynpaw ba ha ka por ba la thombor ïa ka shnong Zairawn ha ka 7 tarik, Naiwieng, ki CRPF ki la ïeng hajan kum ki nongpeitkai kiba sngap jar, da kaba ailad ïa ka kynhun kieng atiar jong ki Meitei ban thombor ha ka rukom kaba ishyrkhei ïa ki briew kiba lui-lui.
Ha kane ka jingïakhih, ki paidbah ki la pynlong ïa ka jinglehniam sngewlem kaba sngewsih ha shilynter ka surok bah National Highway 2, da kaba thang ïa ki sharak bad buh syntiew kum ka jingburom ïa ki shiphew ngut ki nongtrei mon sngewbha jong ka Kuki-Zo kiba la ïathuh ba ki la duh noh ïa la ka jong ka jingim.
Ki Pastor bad ki nongïalam niam ki la ïalam ïa ki jingduwai, da kaba kyrpad ïa ka jingpyntngen na ka bynta ki longïing kiba la duh noh bad ka jingsuk na ka bynta ka imlang-sahlang kaba la shah pynkhih da ka jingduhnoh ki mynsiem briew bad jingtieng jingsyier.
