Shillong, Naiwieng 14
Ka Deepika, nongïalehkai ba dang samla, ka la thep phra kol na ka bynta ban pynlong ïa ka India ka lahduh ha ka aïom ba la dep ban pynjem khnap ïa ka Thailand haduh 13-0 kol bad ka la thikna ban jam sha ka semi final ha ka Asian Champions Trophy hockey tournament kaba la long ha ka sngi Palei.
Ka la long ka jing- ïalehkai kaba noh shilliang namar ba ki ‘thei ïalehkai ka India ki la lah ban ïakhun tyngeh nadu kaba sdang bad ki ïoh ban thep kol katba ki mon. Na liang ka Thailand kam shym la lah ban pynphai wat tang shi kol ruh ïa ka liang pyrshah.
Ka Deepika (3, 19, 43 45 & 45) ka la thep marwei haduh san kol, katba ka Preeti Dubey (9 & 40), ka Lalremsiami (12 & 56) bad ka Manisha Chauhan (55 & 58) ki la thep mar ar kol. Ïa ki shi kol la thep da ka Beauty Dung Dung (30) bad ka Navneet Kaur (53) na ka bynta ban jop lai sien lynter ha kane ka lympung.
Kham ha shwa, ka India ka la lah ban pynliem ïa ka Malaysia da 4-0 kol ha shwa ban kan jop da 3-2 kol ïa ka South Korea.
Kumta ka Indian kan pynkhreh ban ïakhun ïa ka kynhun kaba la khur takma runa ha ka Olympic, ka China ha ka sngi Saitjaiñ.
Kumba ka long mynta ka India ka la don ha ka kyrdan kaba ar ha kaba ka la kamai 9 point, kajuh bad ka China ka la bat ïa ka kyrdan ba hakhlieh kaba, hadien ba ka la tam da ka jingïapher ha ka jinglah ban thep kol (China + 21 & India +18).
Ki saw tylli ki kynhun kiba wan ha ki kyrdan ba shakhmat ha kaba kut jong ka ’round-robin league’ kin ïoh rung sha ka semi final.
Ha katei ka jingïakhun ka India ka la lah ban ïalehkai bha naduh kaba sdang ha kaba ki nongïalehkai ‘dien ka Thailand kim shym la lah ban khanglad na ka jingkhlaiñ bor jong ka liang pyrshah.
Ha kane ka jingïakhun ka India ka la lah ban pynurlong haduh san na ki 12 tylli ki penalty corner.
Haba phai sha kawei pat ka jingïakhun, ka Malaysia ka la pynliem noh ïa ka Korea da 2-1 kol bad ka China ka la ïai bteng ban pynliem sa ïa ka Japan da 2-1 kol.
