Shillong, Naiwieng 14
Ka selection committee jong ka Meghalaya Cricket Association ka la pynbna ba kan pynmih da kajuh ka kynhun na ka bynta ka jingïakhun kaba san ha ka U-23 Col CK Nayudu Trophy pyrshah ïa ka Railways, ka ban long naduh ka Sngi Thohdieng ha Rajkot kaba ha Gujarat.
Hadien ba la kyntiew sha ka elite level hadien ba ka la wan ba-ar ha ka plate group ha ka samoi ba la dep, ka Meghalaya ka la shah rem ha ki saw tylli ki jingïakhun, kita ha ka Punjab, Andhra Pradesh, Himachal Pradesh bad Rajasthan.
Ka jingïalehkai kaba khatduh pyrshah ïa ka Rajasthan ha ka taïew ba la dep la ïohi ïa ka jingkiew ha ka rukom ïalehkai wat la ka Meghalaya ka la shah rem da ka inning bad 29 ron.
Khlem artatien u Manish Sharma u dei u ‘rangïalehkai ba paw jong ka Jylla, namar u ïoh 6/110 ha ki 39.4 over, katba ka Rajasthan ka la shah pynkhyllem hadien ba ka la kamai 352 bad 62, bad ka Meghalaya ka la kamai 143/10. Hadien kane, u Sachin Kumar u la tied 68 ron na ka bynta ban wan ha ka kyrdan ba ha khlieh duh jong ka thup namar ba ka Meghalaya ka la shah pynkhyllem baroh na ka bynta ki 180 ron.
Mynta ka Meghalaya ka kyrmen ba kan ïalehkai kham bha shuh shuh haba kan ïakhun pyrshah ïa ka Railways naduh ka Sngi Thohdieng. Ka Railways ka la jop shisien na ki saw tylli ki jingïakhun, ha kaba ka la ïakhaid arsien bad ka jingshah rem shisien.
Ki rangïalehkai ka Meghalaya ban ïakhun pyrshah ïa ka Railways ki long u Kevin S Christopher (C), Manish Sharma (V-C), Rohit Kr Yadav, Sachin Kumar (WK), Abhishek Kumar, Kush Agarwal, Gavineal J Marpna, Bipin Kr Ray, Josiah Momin, Joydeepan Deb, Banialam Mylliemngap, Gulgul Sangma, PM Santhosh, Thunun Marak (WK) & Swastic Chettri, katba kiwei kiba la pynap lypa ki long u Agreas Cham Cham Sangma, Navin K Ray, Aman Kumar, Bharat Gurung bad u Raghav Magotra.
Ki coach ki long u Neetesh Sharma (Head Coach), Synrapsing Riahtam (Assistant Coach), Emidao Dhar (Physio), Skhembor Khongbtep (Trainer) bad u Chuba R Marak (Manager).
