U Nongsaiñ Hima,1979
Ha ki kot – pule ki khynnah rit, bunsien la ju pynïadei ïa ki khlaw bad ka kam beh mrad ne siat sim siat doh, bad la ju kheiñ kum ka jaka bangiew kaba dap da ki jingma bad jingmynsaw suda. Ka por ka la ih bha mynta ha kaba ngi la dei ban pynkylla ïa ka jingmut jingpyrkhat jong ki ban pynrung bad pynsngewthuh ha ki ïa ka jingkordor jong ki khlaw ki btap na ka bynta ka ri bad ka jaidbynriew.
Ki khlaw na ka jinglong ka mariang hi ki long ka ‘lang khaspah kaba lah ban ïai pynthymmai man la ki por. Ki don ruh ka bynta kaba khraw ban leh na ka bynta ka ioh ka kot jong ka ri. Ka jingpynïaid pynïeng ïa ki khlaw ki btap, ki don la ki jong ki jong ki jingthmu bad la ki jong ki jong ki jingpynïabynta. ïa ka jingpynïaid bad sumar sukher ïa ki khlaw ki btap, la pynbynta naduh ki por bamynshuwa, ha ki lai – tylli ki bynta kiba ïar – ki khlaw kum ka atiar kaba ïada, kaba pynmih jingmyntoi bad kaba pynsngewbha, mynta sa kawei pat ka khlaw ïa kaba ngi iohi ba ka la sdang treikam hangne ha ri India jong ngi ka long ka khlaw Sorkar kaba long shabar jong u pud jong ki khlaw (reserve forest)
Ka Sorkar lyngba ki plan san snem jong ka, ka la leh shibun na ka bynta ban pynbha ïa ki khlaw hapoh ka ri ha ka rukom kaba ryntih bad ba la plan bha. Ka jingpynlut jong ka Sorkar ha kaba pynbha bad sumar ïa ki khlaw ki btap ka long kaba jur.
Ha ka Plan kaba saw, ka Sorkar ka la pynlut kumba 89 klur tyngka hynrei ha ka Plan kaba san pat la thmu ban pynlut haduh 216 klur tyngka. Ki khlaw ki btap ym tang ba ki ïada ïa ka jingtuid noh ka sboh da ka jingshoh jong ka sngi bad u slap hynrei ki iong ruh ki jaka shong jong ki mrad ki mreng bad ki sim ki doh. Ka jingdon ki khlaw, ki ai ka jingmyntoi kaba khraw ïa ka ri lyngba ki jingmih kiba mih na ka.
Ngi ki briew ngim lah satia ban im khlem ki khlaw. Ki kot shon khubor, ki kot – sada, ki dieng ba ngi shna ïing shna sem bad kiwei, kine baroh khoit ngi ioh na ki khlaw. Lada ym don ki khlaw, kane ka jingtrei, kam don jaka satia ban ïeng. Ka jingshalan ïa ki jingmih na ki khlaw ka long kaba jur shibun.
Ki khlaw ki long kawei na ki bynta bakongsan tam jong ka kamai kajih jong ki riewlum. Ka jingshalan ban kyntiew shaphrang ïa ka jingmih ki khlaw ki btap ki long shi bynta na ka Plan san snem. Ki paidbah namar-kata ki dei ban ïasoh kti lang bad ka sorkar ban pynbha ïa ki khlaw ki btap, ban lum ban lang bad ban lam ïew lam hat ïa ki jingmih jong ki lyngba ki seng synrop bad kumta kan pynheh ïa ka kamai kajih bad pynmih ki jingtrei jingktah ïa ki briew.
Kawei na ki jingeh kiba mih ha kaba pynïaid bad sumar sukher ïa ki khlaw ki btap dei ka jingpynjot jong u khun bynriew hi. Ban iada ia ki khlaw na ka jingpynjot pynjulor kam shong shong eh tang ha kaba pynbun ïa ki nongpeitkhlaw hapoh ka Forest Department. Hynrei kaba donkam eh ka long ka jingïashim bynta jong ki paidbah nongshong shnong.
Ka Forest Research Institute. Dehra Dun ka la thmu ban pynkhreh ban pynmih ki kynja kot pule ha ki skul bad ki kolej khnang ban ai ka jingsngewthuh kaba khambha ïa ka jingdonkam jong ki khlaw ha ka liang ka khih ka kamai jong ka ri. Ka skim kaba dei ïa ki samla pule ha ki skul bah ka National Service Scheme ka la shim ïa ka jingpynlong khlaw kum kawei na ki phang jong ka jingialang jong ki nongïalam bad la kyrmen da ka jingpyntreikam ba thikna ïa kane ka skim kan pynkhih ïa ka jingïatip lem ban ïada ïa ki khlaw bad ban pynroi pynsan ïa ki.
