I. R. Dkhar
Ka Sorkar ka la bthah ïa ki Deputy Commissioner bad ki Superintendent of Police ha ki distrik East Khasi Hills bad ha ki distrik baroh jong ka Jylla ba ki dei ban leh da kaba tyngeh ïa ki kali kiba ñiah khlemakor bad pynher stet ha kaba la mih ka jingtyngkhuh kali bad ka jingshim ïa ki jingim ki briew (U Nongsaiñ Hima dt. 30/7). Ngi ngeit ba kane jingbthah ka Sorkar kam long tang ïa ki kali bapher bapher hynrei khamtam ïa ki arshaka kiba ngi ong ki Skoti ne ki Bike. Ha kaba ïadei bad kane, nga sngew ban pynpaw ba ka Sorkar ka la leh ïa kaba dei eh. Wat la kane ka jingmana ka la dier, hynrei ka bha pat ban ïa kaba ym leh eiei, kumba ong ka ktien phareng, “better late than never”. Ka jingñiah ïa ki kali bad ki skoti ka la long kaba la ikhlem akor shaba palat. Kane ka jingñiah khamtam, ki skoti bad ki bike, ngi ïohi ka long ba ki phrung beit ne overtake napdeng jong kiwei pat ki kali, kiba ïaid ha la ka pali. Kane ka jingñiah kali khamtam ki skoti ne ki bike, ka pyni khlem pep ïa ka jingsarong jong ki. Ki kwah tang ban ryngkoh ne kynthih nalor kiwei pat ki kali, kum ban shu ong noh, khlem ap la ka lynti. Khamtam ha kane juk kaba la bun palat ki skoti, la i thik ka jingñiah sarong jong ki samla, ka la wanrah shisha ïa ka jingtieng bad jingsyier ïa ki nongleit nongwan da ka kjat bad para kali ruh. Kumba ngi tip, ka jingaksiden ka la long kaba jia man ka por. Ka jia ym tang ha ki surok highway ne ki surok 4-lane, hynrei ha ki surok kiba sha kyndong jong ka sor ruh. Ka jingjia aksiden ka ju jia bha man ka por ha ki surok highway kum ha Nongpoh namar ka dei ka jingpynher stet palat. Ki skoti bad ki bike ki ju phrung beit napdeng jong kiwei pat ki kali. Bad haba ki phrung ne overtake, da ka jingpynher stet da ka jingsarong, ka jia ka jingaksiden bad poi sha ka jingiap. Haba ngi ju iohsngew ïa kine ki aksiden, ka pynlong ïa ngi ki nongsngap bad paidbah ba ka dei thik ka jinglong arkhlieh ne la shoh u khawiang. Ne ka lah ban long ba ki la ñiah pynher da kaba sngewmeng haba shong bad la ka samla nadien, khlem pyrkhat shuh ïa ka tipbriew tipblei bad ruh ïa ka aiñ jong ka Motor Vehicle Act. Kim tip ne kim pyrkhat shuh ïa ka longbriew manbriew ban ioh ïa ka jingkop bad jingïaroh na ki briew.
Haba ngi ju ïakren bad ki rangbah bad longkmie, kiba ju ïaid kai step, ki ju ong ba ban ïaid ha surok bad ban kiar ïa ki kali, ka long kaba ma bha ïa ka jingim. Ki ju ong ba ka kham tieng ïa ki skoti kiba ñiah stet palat ban ïa ki kali. Ki ong ba haba kiar ïa ki skoti ne bike ki hap ban pyrkhat arsien wat ban ïaid kai ha ka por step. Ki ong ba ki kham tieng ïa ki skoti bad ki bike ban ïaid ha surok khamtam mynstep. Ym tang kane ka jingshem jong ki rangbah bad longkmie kiba ïaid na ka bynta ka jingkoit jingkhiah jong ki, hynrei wat ha ka por mynsngi bad janmiet ruh, ka jingbun palat jong ki, ka pynlong ïa ki paidbah nongïaid lynti ki tieng bha ioh shah tynrah bad shah lymbub ha kine ki akshaka. Imat kine kim tieng khyndiat ruh ïa la ka jingim la jong. Wat ki samla kiba dang hapoh 18 snem ka rta, ki la ñiah skoti. Kim don laisen bad namar kim ioh ïa ka laisen ha ka rukom kaba dei katkum ka aiñ jong ka Motor Vehicle Act, ki ñiah la ka ñah beit. Bun ki shu thied ruh wat ïa la laisen. Kane ka long kaba be-aiñ bad ka Sorkar lyngba ka tnat jong ka, ka la dei ban peitngor bad kem da kaba tyngeh. Nalor kane, ngi shem ruh ba bunsien ki don ki jait skoti bad ki bike, kiba pynher stet bad ki pynpah jingsawa (sound) shaba palat ha surok khamtam hajan dukan bad ïing briew kaba ktah ïa ki skhor bad jingshitom jong ki briew.
Namarkata, ngi ai ka jingïaroh ïa ka Sorkar kaba la leh ïa kaba dei eh kumba la ong haneng, ngi kum ki nongshongshnong, ngi ai jingmut ruh ïa ka Sorkar, ki DC bad SP ba ki dei ban peitngor bha ha kane ka liang bad ban check bad pynshitom katkum ka aiñ ïa kiba pynkheiñ ïa ka aiñ ñiah kali khnang ba kan long ka jingsneng ïa kiba ñiah khlemakor ne ñiah sarong khnang duna ka jingaksiden bad ka jingim jong ki mynsiem briew. Hooid, ngi lah ban ong ba kan don ka jingthut jong ki kali, kaba ngim lah ban tip lypa, hynrei ka jingsumar ka ïarap shibun ïa ki jing-ñiah khlemakor bad jingsarong ka jingpynher stet shaba palat jong ki nongñiah khlem pyrkhat shuh.
