Shillong, Naiwieng 18
U Koswell Syiemlieh na Sohra Rim lem bad ar ngut ki rangbiria ka Lait-kyrhong ‘A’ ki la rah ïa ka nam lahduh ha ka ïakob siat khnam para marwei bad kynhun jong ka Rongbiria Seng Kut Snem 2024 ba la pynïaid da ka Rongbiria Committee ka Lum Jingthang Commit-tee, Seng Khasi Kmie.
Kane ka jingïakob ka la long ha ka 17 tarik mynta u bnai ha madan Second Ground, Polo.
Ïa ka nam ba-ar bad balai ha ka ïakob siat para marwei la ïoh ban rah da u Shemphang Kharmaw-phlang na Lumparing-Lumsohphoh bad u Kyrshanborstar Kharshi-ing na Smit. Katba ha ka ïakob siat kynhun ïa ka nam ba-ar la rah da ki Arngut Siatlang na Nongmynsong.
Ha kane ka kynti, ha ka ïakob siat khnam para marwei la don haduh 215 ngut ki rangbiria kiba la mih madan ban ïaknieh ïa ka nam lahduh bad ha ka ïakob siat kynhun la don haduh 81 kynhun kiba la mih madan ban ïakhun.
Ka khusnam ïa ki nongjop ha ka ïakob siat para marwei ka long T. 15,000 ryngkat bad u ‘nam rupa, ba-ar T. 7000 bad balai T. 3000.
Katba ha ka ïakob siat kynhun, ka lahduh ka ïoh ïa ka song pisa kaba long T.35,000 lem bad ki stieh khun, ba wan ba-ar T.15,000 bad ki ar kynhun kiba wan ba-lai ki ïoh ïa ka song pisa kaba long mar T.5000.
Ïa kane ka ïakob la lah ruh ban pynlong da ka jingkyrshan jong ka Centre Point Group Enterprise.
Ha shwa ban sdang ha ka por mynstep, ka la don shwa ka nguh ka dem kaba la pyndep da u Rgh Skor Jala Chairman ka Komiti Tymmen u San Seng Khasi Kmie. Hadien kane la ïoh pat ïa ka jingkren na u General Secretary Seng Khasi Kmie Rgh Hainess Marbaniang bad pynbud pat da ka jingkyntiew ïa ka lama lem bad ka jingkren na u kongsan u Rgh O. Pyngrope, President Seng Khasi Kmie.
Ha ka por ba sam pat ïa ki khusnam, u kongsan ba la wan ban ïa don lang dei Pa’iem Dr Balajied Singh Syiem, Syiem ka Hima Khyrim, nangta u General Secretary bad ki dkhot ka JPK ka Seng Khasi Kmie.
Katba ïa ka lama jong ka seng la pynhiar da u Rgh D.L Nongbri Vice President Seng Khasi Kmie.
