D. H. KHARKONGOR
Mano ban lah khlem da sngewkhia bad sngewdiaw ruh de, ïa kane kaei kaei kaba jia, kumne mynta, ha ka skul bah North Eastern Hill University (NEHU). Ki kynrum-kynram ne ki jinglong ki jingman, kiba hapoh ka skul bah NEHU, kiba pyndiaw bad pynbitar ruh de ïa ki samla pule ki jong ka, kat haduh ba kim banse shuh ban ïakhih beit noh da kaba tyngeh. Ka jingïakhih kaba ki thmu ban ym sangeh tat haduh ynda urlong kita ki jingdonkam bad ki jingangud ki jong ki. Ka jingïakhih kaba kat haduh ba kin da jam syndon shaduh u pud u sam jong ka jingïashah thngan ne ka jingshah jingit ne ka ‘Hunger Strike’.
Na kane ngi lah ban sngewthuh shai ba ki bapli ki samla pule kiba shong shah thngan kim bam ïa kano kano ruh ka bam kaba tei met tei phad ha ryngkat ka bam kaba ïarap ban pynkupbor ïa ka met ka phad. Ki samla pule kiba shah thngan ki shu kyrda ïalade tang da ka um, kaba ym artatien kaba la khlehlang bad u ‘glucose’. Ka jingshah jingit ka jong ki pat ruh kaba la kynjoh palat ïa ka shiphew sngi. Kaei kaei kaba ktah jur bha ïa ka koit ka khiah ka jong ki. Kaei kaei ka ban sa ngan ïai ktah ruh de, ïa ka koit ka khiah ka jong ki, naduh ïa ka met ka phad tad haduh ïa ka pyrkhat ka pyrdaiñ,wat hadien ka jingsangeh noh ka jong ki ïa kane ka jingshah jingit ka jong ki.
Kaei kaba mih na kane kaei kaei ka long ba wat ka ‘High Court’ jong ka Meghalya ruh kam banse ban shim khia kat ban kynto lem noh ïa ka Sorkar Pdeng ba kan leh ïa kaba donkam, kata, ban loit ban law bad ban pynbeit biang noh ïa uta u ksai (ki kynrum kynram bad ki jingduna ki jingbakla kiba hapoh ka NEHU) uba la sohkyrdot. Kane ka long kat kum ka PIL ba la leit rah da u Phuyosa Yobin, uba dei uwei na ki ‘advocate’ jong ka High Court, Meghalaya. Ka ‘High Court’, Meghalaya, ka khmih lynti ne ka ai por ïa ka Sorkar Pdeng, ba sdang ïa kata kaei kaei, hapoh ka 20 tarik ka jong une hi u bnai.Te to ka Sorkar Pdeng pat ruh, lyngba ka ‘Ministry of Education’, ka la pyntip ba ka ruh ka lah shim khia ïa kane kaei kaei, kata, ba ka la thung syndon da ka ‘committee’ kaba kyrpang, ka ban tohkit kyrpang ïa baroh kita ki kynrum ki kynram ne ki jinglong dkoh ha ka rukom pynïaid ïa ka NEHU. Ka Sorkar Pdeng ka da ai por ruh de, 15 sngi, ïa kata ka ‘committee’ ba kan tohkit bniah bha halor kita kiei kiei bad ban ai ïa ka kaiphod halor kata ka jingtohkit. Ha kata hi ka kaiphot ne ka ‘Report’ kata ka ‘Committee’ ka dei ruh ba ai jingmut da kumno ban lah ban loit ban law bad ban pynbeit biang noh ïa uta u ksai uba la sohkyrdot. Te to ngin ïa kyrmen ba ka ban sa mih na kata ka jingtohkit kan long kaei kaei kaba bha lang ïa baroh.
Te to kiba tip te ki tip shai bha uei une u Vice Chancellor (VC) jong ka NEHU, u Prof. Prabha Shankar Sharma bad ruh da kumno bad mano (napdeng ka ‘Selection Committee) ba ibit ïa uba un shimti kum u VC jong ka NEHU, wat haba kita kiwei pat ki ithuh shai, naduh nyngkong ka sngi,ba um long uba bit kat ban bat ïa kat ka kyrdan VC. Ynda kumne mynta baroh baroh ki sngewthuh shai ba u Prof. Prabha Shankar Sharma um don ïa ka jingtip bad ka jingtbit kat ban long u VC, bad lah ban ong jong kano kano ka skul bah ne University. Kiba tip ki tip shai ruh de uei uta u Registrar, u Colonel (retired) Omkar Singh bad ruh uei uta u Deputy Registrar, u Amit Gupta bad ïa ka rukom kaba ki ïoh ban kiew ha kata ka kyrdan. Kiba tip kim phylla ba balei ba ka mih kane ka jingdawa ban weng noh shi syndon na NEHU ïa kitei ki lai ngut, nalor kiwei kiwei, kata, ïa u Prof. Prabha Shankar Sharma, kum u VC, ïa u Colonel (retired) Omkar Singh, kum u Registrar, bad ïa u Amit Gupta, kum u Deputy Registrar. Ki jingdawa, kaba lah ban ong ba la dawa shwa da ki NEHUSU, ïa kiba la kyrshan ym tang da ka NEHUTA, ka MeTTA-NEHU bad ka NEHUNSA hynrei ynda kumne mynta wat ka imlang ka sahlang ne ka ‘civil society hi ruh.
La katta ngam sngewdei ban tei pap tang ïa une u VC uba mynta hynrei wat ïa u VC uba ha shwa jong u, u Prof. S K Srivastava. Nga ngeit ruh ba kam long kaba bakla ban ong ba ki don ruh kiwei kiwei de kiba ïa don bynta ha kaba pynsoh kyrdot haduh katne katne ïa une u ksai. Lah ban ong ba ki don napdeng jong ki kiba dang don bynta haduh mynta mynne bad ka NEHU. La katta ka dei pat ka kamram ka jong une u VC uba mynta, u Prof. V C Sukhla ban loit ban law ïa kat kaba kiba ha shwa ki la pynsohkyrdot. Kam dei ïa u, wei haba u treh ban shimti ïa ka shuki, ba un tei pap ïa kiba ha shwa kumba kam dei ruh ïa u ba un dang pynsohkyrdot shuh shuh pynban, ïa une u ksai. Kum ban shu ong noh u dei ban don ïa ka jingtip (knowledge), ïa ka jingtbit (competency) bad ïa ka jingshlur (moral courage) ban leh ïa kaba dei eh (right), da kaba khanglad pat de ïa kaba bakla na kiba bakla (wrong).
Pynban kam long kumta naba u leh pynban (commit) ïa kaba um dei ban leh nalor ba um treh pat de ban leh (omit) ïa kaba u dei ban leh. U bapli u ‘Idiot’, uba shu rhah khlemakor ïa kaei kaei kaba um lah. U ‘Idiot’, uba sarong biej ïa ka ‘shuki’ kaba u ioh ban shong, khlem da lah pat de ban thaw pyrthei. Um ïapher na u rakot uba dait rhah, kata, uba dait palat ïa kaba u lah ban kbum bad ban ktha pynlwet. Uba ha kaba kut ban khlei noh ruh u ‘bynnud ban ‘nguid’ jlang sha la kpoh ruh um lah. Ngin kyrmen ïa kaba bha.
