Shillong, Naiwieng 18
Ka Combine 12 FC na Mawlai Mawïong ka la long ka lahduh ha ka lympung ïalehkai Mawlai Futsal League ba la pynïaid da ka Samkhamti, hadien ba ka lah ban pynliem noh ïa ka Second Chance FC na Mawlai Motsyiar da 1-0 ha ka jingïakhun final kaba la long ha Hellick Lina Mini Stadium kaba ha Mawlai Mawdatbaki ha ka 16 tarik mynta u bnai.
Lyngba kane ka jingjop, ka Combine 12 FC ka la ïoh rah ïa ka trophy ryngkat ka song pisa kaba 15,000 tyngka, katba ka Traisiej FC ka la wan ha ka kyrdan balai hadien ba ka la jop ïa ka Mali FC da 1-0 ha ka jingïaknieh ïa ka kyrdan balai (Third Place).
Ka phangpdeng jong kane ka jingïakob ïalehkai phutbol futsal ka long “Say no to Drugs and Yes to Sports” kaba mut “Ong Em ïa u Drok bad hooid ïa ka Sport.
Ha katei ka jingïakhun final la wan ban sakhi lang da u Bah P.T Sawkmie, MLA barim kum u kongsan ha ka jingdon ryngkat u Bah Teiborlang Pathaw, MDC ka Mawlai Constituency, u Bah Samuel Biam, President ka Seng Samla Mawlai Pyllun, u Bah Sam Diengdoh bad kiwei kiwei.
Ha katei sngi u Bah Sawkmie u la noh synñiang ruh da ka song pisa sha ka Samkhamti na ka bynta ban ïa don bynta lang ha kane ka jingïakob.
Ha katei ka sngi la sam ruh ïa ki khusnam shimet ha kaba u Alfred Kharwanlang na ka YTBC u la ïohpdiang ïa ka nam Golden Boot hadien ba u la ïoh ban thep 7 tylli ki kol, katba ïa ka nam Best Goalkeeper la ïohpdiang da u Brandon Diengdoh na ka Second chance FC bad ïa nam Player off the Tournament la ïoh da u Welbert Kharlukhi na ka Combine 12 FC.
Ki kynhun kiba la wan shim bynta ha katei ka Mawlai Futsal League ki la don haduh 64 tylli ki kynhun.
