Nongpoh Naiwieng 19
Ka Ri Bhoi District Sports Association (RBDSA) ka la sdang ïa ka lympung ïalehkai phutbol ba la tip kum ka Ri Bhoi League Super Division ha ka Sngi Ba-ar ha ka madan ïalehkai jong ka shnong Umdihar bad kane ka lympung ka long shi bynta ban kyntiew ïa ka kam ïalehkai phutbol hapoh ka district.
Ïa kane ka lympung la plie paidbah da u MDC jong ka Nongpoh konstitwensi, u Bah Balajied Rani ha ka jingïadon ryngkat jong u Bah R.R Makdoh, Adviser ka RBDSA, u Bah R.B Shadap, President ka RBDSA lem bad kiwei kiwei ki ‘riew rangbah.
Kum ban shu kdew ha kane ka lympung Ri Bhoi League Super Division kaba la pynlong da ka RBDSA mynta ka kynti, ki don haduh 12 tylli ki kynhun na kylleng ka Ri Bhoi ki ban sa wan ïashim bynta ban ïoh rah ïa ka nam lahduh.
Haba phai sha ka jingïalehkai ha kane ka sngi sdang, ka Umran Dairy Sports Club ka la ïasam mar shi point bad ka Kongripara Sports Club hadien ba ki la ïakhaid mar 1-1 kol.
