New Delhi, Naiwieng:
Hapdeng ka por ba jur ka jingjaboh jong ka lyer, ka Sorkar Delhi ha ka Lah Sngi U Blei ka la pynsangeh noh ïa ka jingleit jong ki khynnah sha skul na ka bynta ki klas 10 bad 12.
“Naduh mynta ka sngi, la pynsangeh noh ïa ki jing-leit jong ki khynnah sha skul na ka bynta ki klas 10 bad 12 kumjuh, bad baroh ki jingpule yn pynkylla noh sha ka Online,” ong ka Myntri Rangbah jong ka Delhi, ka Atishi, ha ka jingthoh kaba la phah ha ka rynsan X.
Katei ka rai ka la mih hadien ba ka Supreme Court ka la bthah ïa ka jylla Delhi bad NCR ban shim ïa ka rai ha kaba ïadei bad ki Online Class na ka bynta baroh ki khynnah pule bad pyntip sha ki hapoh ka Sngi Thohdieng.
Ka jinglong ka lyer ha Delhi ka la hiar haduh katta-katta ha ka Lah Sngi U Blei, kaba la pynlong ïa ki briew ban kun mynsiem bad ki jingdait jong ki khmat bad ka jingsat ryngkat naba ka jingjaboh jong ka lyer katkum ka Air Quality Index ka la poi haduh 494.
Ki doktor ki la pynpaw ïa ka jingsngewkhia shaphang ki jingma ïa ka koit ka khiah, da kaba maham ba ka lyer kaba sniew ka lah ban pynmynsaw ym tang ïa ki kynhun kiba rit hynrei wat ki briew kiba koit ba khiah ruh.
Hynnin ka sngi, ka Supreme Court, ka la ther tyngeh ïa ki bor synshar ha Delhi bad ki jaka ba marjan.
Ka la pynpaw ïa ka jingpynslem ban pyntreikam ïa ki lad ki lynti kiba kham pyrkhing hapoh ka kyrdan kaba saw jong ka jingthew ban ïada ïa ka jingjaboh ka GRAP.
Ka Ïingbishar ba ha khliehduh ka la rai ba ki jingkhang kin dang treikam wat lada ka Air Quality Index (AQI) ka wan hapoh 450.
Ka kynhun nongbishar jong u Abhay S Oka bad u Augustine George Masih ki la buh jingkylli ïa ka kynhun ba pyrshah halor ka CAQM kaba ïakhun pyrshah ïa ka jingjaboh ka lyer ba ka la pynslem ban pynjari ïa ki jingpyrkhing.
Lada ym khang ïa ki skul, ka jingma ka ap kham palat ïa ka koit ka khiah jong ki khynnah khamtam kum ha kane ka por ba ka jingjaboh jong ka lyer ka la nang jur bad saphriang sha kylleng ki jaka.
