Guwahati, Naiwieng:
U Myntri Rangbah ka jylla Assam u Himanta Sarma u la pynthymmai ïa ka kyrteng jong ka Karimganj District da ka Sribhumi, ha kaba ka jingpynthymmai ïa kane ka district ka long ruh ka jingangnud jong kiba bun ki nongshong shnong jong kane ka district. Ha ka Sngi Ba-ar ka sorkar Assam ka la pynkylla noh ïa ka kyrteng jong ka Karimganj district kaba don ha Barak Valley sha Sribhumi ha kaba ïa kane la pynbna da u Myntri Rangbah ka jylla u Himanta Biswa Sarma. ïa kane ka rai la shim ha ka jingïalang jong ka kynhun Myntri ong u Sarma ha kawei ka Press Conference.
Haba ai jingkren sha ki lad pathai khubor u Himanta u la ong ba kumba 100 snem mynshwa u Kabiguru Rabindranath Tagore u la sin ïa ka Karimganj district kum Sribhumi – the land of Maa Lakshmi bad mynta ka sorkar Assam ka la shim ïa ka lad ban pynurlong ïa ka jingangnud jong kiba bun. Shuh shuh u la bynrap ruh ba ki la don shibun bha ki jingthmu ban pynkylla ïa ka kyrteng jong katto-katne ki shnong bad ban ai noh da ki kyrteng kiba la mynjur bad kiba la pdiang da kiba bun bad kumjuh kiba la ïahap da baroh. Nalor kane ka State Cabinet kan sa pynmih ruh ia ki kyrteng jong ki nongthep vote na ka bynta ka panchayat polls ha u Nohprah bad ba ka ilekshon ha kane ka jylla kan long ha ka 10 tarik u Rymphang 2025.
Sa kawei ruh kaba u Himanta u la pynbna ha katei ka sngi ka long ruh ba ka Kynhun Myntri kan sa pynlong ïa ka ‘Investment and Infrastructure Summit ha Assam ha ka 14 tarik u Rymphang ha kaba la khot sngewbha ïa u Myntri Rangbah duh ka ri u Narendra Modi kum u shong-knor. Ha shwa jong kane, ka sorkar kan sa pynlong ruh ïa ki Roadshow ha kylleng ki jaka bad nongbah kum shi bynta ban khring ha kaba ïadei bad ka jingpynlong ïa kane ka Summit.
