Rgh. Run Khonglanoh Riwar Mihngi
Seng Kutsnem basuk bakmen ïaphi ki kur ki kha haka Ri.
Parakur parakha, mynta ka snem ngi ïoh ban rakhe ïa ka Seng Kutsnem kaba shi-spah-arphewsan. Ka Seng Kutsnem ka ai hangi ïaka khubor kaba kham kyrpang naka bynta ka Jaidbynriew Khasi. Kaei kata ka khubor kaba ka Seng Kutsnem ka don ban ai? To ngin ïa kyrtiang dien khyndiat sha ka mynnor. Mynnor ha ka por jong ki Longshuwa ki Manshuwa, ka Jaidbynriew ka don ha ka jingimsuk jingimsaiñ, ki kur ki kha ki shong ki sah, ki bam ki dih, ki ïaid ki ïeng, ki trei ki ktah, ki kamai ki kajih, ki duwai ki kyrpad, ki ngeit ki mane da ka jingsuk jinghun daka jingkhuid jingsuba. Ki jingngeit jingmane bad ki jinglehniam jinglehrukom ki don haman la ki rympei ïing, ha man la ki kur, ki kpoh-kur, haman la ki shnong ki thaw bad haman la ki raid ki hima. Pynban haka snem 1800 (Common Era), ki thrangbor ki thrangspah bynriew na ki thaiñ sepngi jong ka pyrthei, kiba khlaiñbor bha ha kito ki por, kiba ngi khot ki phareng, ki la kyntur-thma kylleng ka pyrthei, ki la wan ban jopthma ïa ka ri India kynthup ïa ka ri Hynñiewtrep baieid jong ngi.
Ki phareng hadien ba ki la ïoh synshar ïa ka ri Khasi, ki la sdang ban ñiewbeiñ ban ñiewpoh ïa ki briew jong ngi, ki sdang ban leh tamti tamjat ïa ki kynthei ki khynnah, kim pynsngap shuh ïaka ñia ka ktien jong ki nongïalam ki nongsynshar raid ki nongsynshar hima. Ki kynnoh beiñ laiphewjait, ki kynnoh riewkhlaw, riew khlem Blei, nongmane ksuid bad kumta ter ter ban pynkulmar jingmut ïa ki briew jongngi. Ban bit ban biang ka synshar donbor jong ki ki phareng ki sdang ban pynshoi ban pynthynrei ïa ka jingngeitnam jongngi, ki hikai ba ngin isih noh ïala ka niam bad ha kajuh ka por ki khroh ki pynngop ïa ki briew jong ngi ba kin bud noh ïa ka niam jong ki, ki tyrwa syndon ba kito kiba bud ïa ka niam jong ki kin ïoh rung sha bneng, bad ki pyntieng ki pynsmiej ba kito ki bym pdiang ki bym ngeit kin shah pynjot ha U Blei. Kata ka buit pynngop jong ki phareng ka la jop shisha ha kaba bun ki briew jong ngi ki iehnoh noh ïa la ka jong ka niam ban leit bud leit pdiang noh pynban ïa kata ka niam jong ki phareng. Ki kur ki kha kiba la bud ïa ka niam ki phareng ki sdang ban ïaleh pyrshah ïa ki dustur riti jong ki Longshuwa ki Manshuwa, kim treh shuh ban pyndep ïa ki niam ki rukom ha la ïing hala sem, hala shnong ha la thaw. Ka Jaidbynriew ka la mad ïa ka jinghiardor shaba palat, ka la orpait ha ka pyrkhat ka pyrdaiñ. Ka umsaw niam phareng ka rong lut ïa ki kñi, ki kmie bad ki khynnah ki khyllung. Ka Jaidbynriew ka la ngat ha ka jingdum jingshaïong, bad i kumba kam lah khie khlieh shuh. Ki kur ki kha kiba ïaineh hala ka niam ki sah haka umdum haka lyngngoh, kim nangshuh ban pyrkhat, ki dap da ka jingkhuslai kaei ka ban jia ïa ki, ki ïaid ki ïeng, ki trei ki ktah da ka jingrit mynsiem bad da ka jingduh jingkyrmen.
Ha kum kane ka khyllipmat jong ka jingduh jingkyrmen, donbok ba ka bor maïan jong U Blei Kynrad ka kren ka pasiaw ha ki jingmut jingpyrkhat jong ki katto-katne ki ‘rang samla kiba don shisha ka jingkitkhlieh na ka bynta ka Jaidbynriew. Kine ki ‘rangkynsai ki lynga ki pisa ki duhthiah ki duhdem haba ki ïohi ïa ka jingwan rong ka jingwan taplup jong ka umsaw kylla niam phareng kaba la ishyrkhei. Kine ki ‘rang ieit Jaidbynriew ki sdang ban ïakynduh para maki na ka por sha ka por, bad ha ki jingïakynduh ki ju ïatai bniah bin-pa-bin kumno ban leh khnang ban ïada ïa ka Jaidbynriew na kane ka jingwan rong ka umsaw kylla niam phareng. Ha ki jingïakynduh kiba bunsiew ki shim ïa ka matphang kaba da sngewthiang shisha, kata ka long “ba la donkam palat ban don noh ka kynja kynhun ne ka kynja seng ka ban long kum ka nongpeitngor ka ban lum ban lang, ka ban kyntu ban kynpham, ka ban batai ban hikai, ka ban ïarap ban ïakhieñ, ka ban da ban ker, ka ban pynneh ban pynskhem, ka ban pynroi ban pynsan ïa kiei kiei kiba dei ki hok ki riti bad ki niam ki rukom kiba kum ka Jaidbynriew ka la ïohdiangti na ki Longshuwa ki Manshuwa”. Haba la biang ka pyrkhat ka pyrdaiñ, kine ki ‘rang ieit Jaidbynriew ki la shim ïa ka rai ban pynsdang noh ïa kata ka kynhun, bad la pynkha ïa ka ha ka 23 tarik November (Naiwieng) 1899, ïa kane ka sngi la suit la shor kum ka sngi Seng Kutsnem kaba dei artat ka aïom ïa byrshem jong ka snem rim bad ka snem thymmai. ïa kane ka kynhun la jer kyrteng ka Seng Khasi, ki nongïakit ki nongïabah ba nyngkong eh, ki don khathynriew ngut. Mar sien dep ban plie ïa ka Seng Khasi, ki kur ki kha ha ka ri ki ïoh mynsiem biang ban pyndep ïa la ki niam ki rukom khlem jingsheptieng.
Ka Seng Khasi ka da ïengskhem ka da ïengrangbah shisha kynjreng ban ïada, ban pynshai bad ban ïalam ïa ki ki kur ki kha na ka bynta ban ïai pynneh ïai pynskhem bad ïai kyntiew ïai pynroi ïa ki hok ki riti ki niam ki rukom kiba ngi kum ka Jaidbynriew ngi la ïohdiangti na ki Longshuwa ki Manshuwa.
Ka Seng Kutsnem kaba dei ka sngi ba pynkha ïa ka Seng Khasi, namarkata, ka ïeng kum ka sngi kyrpang ka sngi khrawbah jong ka Jaidbynriew Hynñiewtrep Hynñiewskum. Ka Seng Kutsnem ka dei ka sngi ksanrngiew jong ka Jaidbynriew. Ka Seng Kutsnem ka dei ka sngi rakhe kyrpang ïa ka hok longbriew-manbriew jong u khun Khasi Khara u Hynñiewtrep u Hynñiewskum. Ka Seng Kutsnem ka dei ka sngi kyrpang jong ki Trai Ri Trai Muluk, u khun Khasi Khara Hynñiewtrep Hynñiewskum. Ka Seng Kutsnem ka dei ka sngi ban pynkynmaw ïa ki kur ki kha ban ïai bteng ïa ka jingngeit ha U Blei Trai Kynrad U Nongthaw U Nongbuh Uba lah Uba ïai na jrong ha tbian. Ka Seng Kutsnem ka dei ka sngi ban kynmaw burom bad ñiewkor ïa ka jingstad jingshemphang jong ki Longshuwa ki Manshuwa. Ka Seng Kutsnem ka dei ka sngi ban kynmaw burom ïa ki nongseng ka Seng Khasi. Ka Seng Kutsnem ka dei ka sngi ban kynmaw burom ïa ki Longkñi, ki Longkmie kiba la aiti met bad mynsiem ban pyntyllun ïa ka Seng Khasi wat hapdeng kiba bun ki jingpynthut ki jingpynwit, ki diengpyngkiang, ki rai-eh rai-dam.
Ka Seng Kutsnem ka ai ka khubor kaba shai kaba shynna kaba ong: “Ko parakur Ko parakha, Ale wan sha Seng ngin ïa pyni ngin ïa kdew markylliang, balei phin khuslai? Ka Seng Khasi ka don ban ïarap na ka bynta jong nga jong phi”.
Sa shisien, khublei Seng Kutsnem ïa phi baroh, to U Blei Un kyrkhu ba ngin ïoh ïa ka khiah krat ka khiah stang, bad ka jingroi ka jingsan ha shilynter ka jingim jong ngi.
Khublei shihajar nguh.
