New Delhi, Naiwieng:
Ki dang don da ki phew hajar tylli ki skul sorkar ha ka ri ki bym pat biang ne don ïa ki ïingskul kiba paka, la paw ha ka jingbuh jingkheiñ ba la wanrah da ka tnat pule puthi. Ha kaba ïadei bad kane ka bynta, la ong ba la kumno-kumno la donkam ban pynbiang ïa ki jingdonkam katkum ki jingdawa jong ki khynnah.
Haba khmih bniah, la ong ba ka jingpynrung kyrteng jong ki khynnah skul ha kum kine ki skul ka la i duna bha, te khnang ban ym ïalam bakla ïa ki khynnah ne ban pynduh mynsiem ïa ki ha kaba kin leit sha skul, ki bor ba dei khmih jong ka tnat ki la dei ban pynbiang ïa ki jingdonkam bad ban pynïoh da ki skul kiba biang bad kiba paka na ka bynta ki khynnah kum shi bynta ban khring ïa ki.
Ha ka jingleit khmih bniah, la shem ba kiba bun ki nongshong shnong ki la angnud ïa ka jingphai khmat jong ki bor ba dei khmih ba kin pynïoh da ki skul kiba paka na ka bynta ki khynnah skul kumba long ha kiwei pat ki jaka sor.
Ki nongshong shnong jong ka Yeripudur kaba don hajan Vazhapadi ki la buh ka jingkyrpad na ki bor pynïaid distrik ba ki dei ban buh ïa ki Middle School ha ka shnong jong ki khnang ban lah pynduna ïa ka jingpep skul shiteng por jong ki khynnah.
Ka Yeripudur ka la long kawei na ki shnong kaba rit kaba don ha A.N Mangalam Panchayat kaba hap hapoh ka jingkhmih jong ka Ayothiyapattinam Panchayat Union ha Salem.
Da ka jingdon jong palat 500 ngut ki nongshong shnong, na ka bynta ki 25 snem ba la leit, ka la long tang ka Government Panchayat Union Primary School kaba la treikam.
Ki la don kumba 1,500 ngut ki khynnah na ka shnong bad ki shnong ba marjan kiba la leit ban pule ha katei ka skul. Kumba ka long mynta, la ong ba ki la don kumba 67 ngut ki khynnah kiba kynthup ïa 35 ngut ki shynrang bad 32 ngut ki kynthei kiba dang pule ha kane ka skul.
Ka la don da ki phew snem mynta, ba ki nongshong shnong ki la buh ïa ka jingkyrpad na ki bor sorkar bad ka tnat ka pule-puthi ba kin buh ïa ka Middle School ha ka shnong na ka bynta ki khynnah pule naba kiba bun na ki ki la hap ban shong kali ha ka jingjngai kaba 10 km na ka bynta ban poi sha Government Higher Secondary School ha Ayothiyapattinam.
Hynrei kam shym la don kano-kano ka jingpyntreikam, la ïathuh ka tyllong khubor.
Ki kmie ki kpa jong ki khynnah skul ki la thaw ïa ka kynhun ïa kaba la tip kum ka Makkal Sangam (People’s Association) na ka bynta ban ïai ban halor katei ka jingdawa.
Ha ka jingïakren bad ki nongthoh khubor, ka nongpynïaid jong ka Makkal Sangam ïa kaba la tip kyrteng kum ka A Kalaimani ka la ong, hadien ba ki la lah ban pyndep ïa ka klas V, ki khynnah ki la hap ban ïaid da kumba 1 km sha ka jaka sangeh bos bad nangne ki la hap ban shong kali da 10 km ban poi sha Ayothiyapattinam Government Higher Secondary School.
“Ka skul ïa kaba la shah ithuh ha ka sorkar ka dei kaba la don hapoh ka jingjngai kaba 1 km. Kine ki skul ki la dawa pisa na ka bynta ka bai rung skul bad ha ki por ba la leit, ki la pynsah klas ïa ki khynnah klas IX naba ki la thmu ban pynïoh 100% kiba pass ha ka jingïakhun ïa ka SSLC exams. Katkum ka Right to Education Act 2009, ki skul Primary ki la dei ban don ha ka jaka kaba jngai tang kumba 1 km, bad ki Middle School hapoh 3 km na ki shnong sawdong kiba ker tawiar ïa ki,” la ong ka Kalaimani.
Ka la bynrap shuh shuh da kaba ong ba ki la ïaid lyngba kiba bun ki kyndon bad ki jingkyrpad hynrei kine ki la shu long leh nohei.
