Shillong, Naiwieng 24
Ka Meghalaya ka la lah ban pynthikna ban jam sha ka wat khatduh (final round) jong ka Senior Men’s National Football Championship na ka bynta ka Santosh Trophy 2024-25, hadien ba ka la lah ban pynïakhaid mar 1-1 kol pyrshah ïa ka Assam ha ka Sngi U Blei ha Nalbari, Assam.
Lyngba kane ka jingïakhaid ka la pynlong ïa ka kynhun ïalehkai ka Jylla hapoh ka jingïalang u Bah Hering Shangpliang (coach) ban bat ïa ka kyrdan ba ha khlieh ha ka Group-E ryngkat 7 point na ki lai sien ïakhun.
Ha kaba sdang kane ka jingïakhun kaba khatduh u Bah Hering u la kylliang tang uwei u rangïalehkai da kaba wanrah ïa u Baiaikara Swer ha ka jaka u Kevin Rymbai ha ka bynta shapdeng.
Ha kane ka jingïakhun ka Meghalaya ka la tip skhem ba ka donkam satang shi point khnang ban pynthikna ban ïoh rung sha kawei pat ka wat jingïakhun. U Damanbhalang Chyne u la lah ban pynurlong na ka bynta ka Meghalaya ban thep ïa ka kol kaba 56, hynrei ka Assam ka la lah ban pynphai kylla lyngba ka penalty na u Dipu Mirdha (88) na ka bynta ban ïakhaid mar shi kol. U Damanbhalang u la ïohpdiang ïa ka nam Player of the Match.
Ïa katei ka kynhun la wan ban ai jingkyrshan da u President ka Meghalaya Football Association u Bah Hamletson Dohling, u General Secretary ka MFA u Sunesh Syiem bad u nongai jingmut jong ka sorkar Jylla u Bah H.M Shangpliang, kiba baroh ki la leit sha Nalbari ban ai mynsiem ïa ka kynhun ïalehkai.
Kat kum ka prokram ïalehkai baroh ki kynhun kiba wan ha ki kyrdan ba ha khlieh jong baroh khyndai tylli ki group kin ïasoh lang sha ka wat khatduh ryngkat ar tylli kiwei pat kiba la rung final ha aïom ba la dep, ka Services bad Goa bad ka Telangana kaba long ka nongpdiang ïa kane ka lympung. Te kumta ka Meghalaya ka la shah pynngat ha ka Group-B kaba kynthup lang ïa ka ka Goa bad Tamil Nadu, Kerala, Delhi bad Odisha.
