Aizawl, Naiwieng:
Ka Sorkar Mizoram ka thmu ban pynkynriah ïa baroh ki phetwir kiba sah mynta ha ki jaka bapher bapher jong ka jylla sha kawei ka jaka ba la buh kyrpang. Ïa katei ka jingtyrwa, la ïakren ha ka jingïalang kaba la long ha ka Sngi Palei, ba la ïalam da u Lalmuanpuia Punte, uba dei u nongai jingmut ha ka saiñ pyrthei jong u Myntri Rangbah ka jylla, bad ki heh sorkar na Lawngtlai distrik kaba don ha ka thaiñ Shatei jong ka Mizoram.
Ka jingïalang ka long halor ka jingeh jong palat ar hajar ngut ki phetwir na Bangladesh kiba sahkut ha katei ka Distrik.
U Punte u la ban jur ïa ka jingdonkam ban buh ïa ki kyndon kiba shai ban khanglad ïa ki nongphetwir ban shong ban sah ne ban leit sha kiwei pat ki jaka khlem ka jingbit kaba biang.
