Imphal, Naiwieng:
Na ka jingpynlong ïa ki jingleit khynra kiba bun, ki shipai ka t nat Indian Army, Assam Rifles, ki pulit jong ka Manipur, bad kiwei kiwei ki shipai ïada ri, ki la ïoh kurup ïa ki tiar siat bad pynbthei, ki bom Improvised Explosive Device (IED), ki kuli ïasiat, bad ki jingbuh tiar thma Warlike Store (WLS) na ki katto katne tylli ki jaka kiba don ha bun tylli ki distrik jong ka Manipur, la ïathuh ka tyllong khubor ba la wan na ka tnat shipai Assam Rifles.
Ïa kane ka jingïoh kurup la tip ba ka la long ha ki thaiñ ba long lum bad them ha ki distrik Imphal West, Churachandpur, Kangpokpi, Imphal East, Jiribam bad Tengnoupal jong ka Manipur ha ki jingtreilang ba bun.
Kham hadien ba la ïoh jingtip ha kaba ïadei bad ka jingpyrshang ban rung tuh sha shiliang u pud u sam jong ka Indo-Myanmar hajan Moreh, ha ka distrik Tengnoupal, ki shipai jong ka Assam Rifles ki la pynlong ïa ka jingkhynra ha ka 17 tarik, Naiwieng.
Hadien ba la ïoh jingtip ba ki la don ki briew kiba nabar kiba ïaid, ki shipai bad ki nongwan rung tuh kiba la mynsaw.
Uwei u pulit pahara ruh u la mynsaw, hynrei la pynkit mar mar sha ka jaka ai jingsumar bad mynta u la kham koit.
Ka la don ka jingpynlong ïa ka jingleit khynra ha katei ka jaka, ha kaba la lap ïa ki tiar hiar thma, kiba kynthup ïa kawei ka suloi Self Loading Rifle (SLR), kawei ka suloi MA1, ki bom Lathode, ki Rifle Grenade, ki bom Mortar bad kiwei pat ki tiar siat.
Katkum ka jingpynlait khubor, ha ka distrik Churachandpur, ki shipai India, ha ka jingïatreilang bad ki shipai CRPF, ki la sdang ïa ka jingïatreilang kaba pynshong nongrim ha ka jingwad bniah ha ka thaiñ H Kotlian jong ka distrik ha ka 20 tarik, Naiwieng bad ka la pynlong ban ïoh biang ïa ki tiar siat ba bun bad kiba khlaiñ bor.
Ha ka jingkhynra lang jong ki pulit ka Manipur bad ki shipai Assam Rifles, ki bor pahara ki la ïoh ban kem ïa arngut ki dkhot jong ka United National Liberation Front (UNLF) ha Porompat.
Ïa kane ka jingkhynra la pynlong ha ka janmiet jong ka 23 tarik, Naiwieng, ha kaba ka la ïarap ban ïohkem ïa arngut ki briew bad ban kurup ruh ïa kawei ka Beretta pistol 9mm bad ki tiar siat.
Ïa kine ki briew ba la shah kem bad ïa ki tiar siat la aiti sha ki pulit ka Manipur, la bynrap shuh shuh ka tyllong khubor. Shuh shuh, ka jingpynbna ka la ong, “Ha ka sienjam kaba skhem ban pynphai biang bad pynneh ïa ka jinglong jingman ha Jiribam, ka jingthwet bad jingkhynra lang da ki shipai na ka Assam Rifles ha ka jingïatreilang bad ki CRPF, ki pulit ka Manipur, bad ka IRB ka la wanrah ïa ka jingjop ha ka 24 tarik, Naiwieng, 2024.”
Da ka jingthmu kaba bniah bad ka jingpyntreikam kaba khlem jingbakla, lai tylli ki kynhun ba ïatreilang ki la pynlong ïa ka jingïatreilang, kaba pynthikna ïa ka jingpynkhuid kaba pura ïa ki jaka ba la ithuh.
Ki bor pahara kiba la shah pynbiang da ki ksew sma dien, ki tiar wad bniah ïa ki nar kiba don bad shah tep shapoh bad ki Drone, ki la pynlong ïa ka jingkhynra kaba bniah ha ki jaka kiba don ha marjan jong ka PS Jiribam bad Jakuradhar/ Borobekra.
Ki kynhun ki la pyndonkam ruh da ki Quadcopter na ka bynta ka jingpeitngor kaba treikam bha kaba pynkhlaiñ ïa ka jingpyntreikam jong ki kynhun shipai,” la bynrap shuh shuh ka tyllong khubor.
