Kolkata, Naiwieng:
Ka Central Bureau of Investigation (CBI) ha ka janmiet jong ka Lah Sngi U Blei ka la kem ïa uwei u nongïalam jong ka seng Trinamool Congress uba dei u nongïarap ba jan jong u Myntri barim ka Bengal u Partha Chatterjee, halor ka jingkynnoh ba u donkti ha ka kam beaiñ ha ka skul, la ong uwei u heh ka kynhun tohkit. U nongïalam jong ka seng TMC na Behala, u Santu Ganguly, u la shahkem hadien ka jingkylli bad tohkit jong ki heh ka kynhun tohkit jong ka sorkar kmie naba ka ophis treikam jong ka hangne ka don bynta ban leh bym hok ha kaba ïadei bad ka jingpynrung kam ïa ki nonghikai ha ki skul Primary ba la pynïaid da ka sorkar jylla, u la ong.
Ka CBI ha ka jingkhynra kaba kham shwa ha ka ïingsah ha Behala jong u Ganguly, ka la ïoh ban kurup ïa ki kot ki sla kiba ïadei bad ka Bank, kiba don ka jingïadei bad katei ka kam beaiñ, la ong u heh jong ka kynhun tohkit.
“U Ganguly u la ïajan bha bad u Partha Chatterjee (u Myntri barim uba dei khmih ïa ki karkhana ha ka jylla). La khot hajir ïa u ha kane ka sngi bad um shym la ïatreilang ha baroh kawei ka jingtohkit. Ngi la donkam ban shim ïa u ha phatok kum shi bynta jong ka jingtohkit,” la bynrap shuh shuh u heh ka kynhun tohkit. Ka kynhun Enforcement Directorate ruh kham mynshwa ka la kylli jingkylli ïa u bad pynlong ïa ka jingkhynra ha ka ïingsah jong u ha kaba ïadei bad kane ka kam thok kam shukor.
