Agartala, Nohprah:
U Myntri Rangbah jong ka Tripura u Manik Saha ha ka sngi Palei u la ong ba ka sorkar jylla ka la mang kumba `.100 klur na ka bynta ban buh ïa ka Tripura Bhavan ha Navi Mumbai.
Hadien ba la leit jngoh ïa ka jaka jong ka Tripura Bhavan kaba la thmu ban shna ha Sector 16 jong ka Kharghar ha Navi Mumbai, u Myntri Rangbah u la ong ba hadien ba la dep tei ïa kane ka Bhavan kan pynsuk ïa ka jaka sah jong ki briew jong ka jylla kiba ju wan sha Mumbai na ka bynta ka jingsumar, ka kam khaïi, ka pule puthi bad kiba bun kiwei pat ki jingthmu.
Uwei u heh sorkar ha Agartala u la ïathuh ba ha kane ka jingleit jong u, u Saha ryngkat ki heh sorkar ka Tripura bad Mumbai ki la jurip ïa kane ka jaka bad bishar bniah ïa ka jingïaid ki kam jong ka Tripura Bhavan bathymmai.
“Da kaba pyrkhat ïa ka jingdonkam jong ki paidbah, khamtam ki briew kiba pang ba shitom, ka sorkar jylla ka la thmu ban buh ïa ka Tripura Bhavan ha Mumbai”, la ong u Myntri Rangbah ha ki lad pathai khubor ha Navi Mumbai.
U la ong, “Ka kynhun Myntri ka la rai ban buh ïa kawei ka Tripura Bhavan ha Mumbai bad katkum kata ban shim ïa ka jaka na ka bynta katei ka jingthmu. Kane ka jaka ka don marjan bha bad ka Tata Cancer Hospital bad lah ban poi lyngba ki ar tylli ki surok. Ki jylla kum ka Sikkim bad kiwei ki jylla ruh ki buh ïa ki state Bhavan ha katei ka thaiñ. Nga la bishar bniah ruh ïa ka jingshna ïa ka jingtei jong ka Tripura Bhavan kaba la tyrwa. Ha ki sngi ban wan, ki paidbah ka Tripura kin ïoh jingmyntoi shibun na kane ka jingthmu.”
U Myntri Rangbah ka Tripura, u la leit sha Mumbai, ha ka sngi Balang, ban ïashim bynta ha ka jingbam smai jong u Myntri Rangbah bathymmai jong ka Jylla Maharashtra.
U Devendra Fadnavis, uba long u heh nongïalam jong ka seng BJP, u la bam smai ha ka sien kaba lai, kum u Myntri Rangbah ka Maharashtra, ha ka janmiet jong ka sngi Palei. Mynta ki don lai tylli ki Tripura Bhavan ha Kolkata, ar tylli ha Delhi bad kawei ha Guwahati. Kham mynshwa la buh ïa ka Tripura Bhavan ha Chennai hynrei hadien la khang noh ïa ka.
