Shillong, Nohprah 10
U Myntri Rangbah ka Jylla, Conrad K. Sangma u la lum jingïalang ïa ki nongïalam ka Meghalaya State Olympic Association (MSOA) na ka bynta ban buddien halor ka jingthmu ban ïoh pynlong ïa ka National Games.
Kane ka la wan hadien ba ka Indian Olympic Association (IOA) ka la pynbna ban pynlong ïa ka 38th National Games ha Uttarakhand ha u Kyllalyngkot-Rymphang 2025.
Ïa katei ka jingïalang la pynlong ha ka 2 tarik mynta u bnai ha ka kamra cabinet jong ka Sorkar Jylla ha kaba la ïadon lang u President katei ka synjuk bad uba long u Myntri ka tnat ïalehkai u Bah Shakliar Warjri, kumjuh u Working President u Bah John F. Kharshiing, lem bad ki ophisar jong ka tnat ïalehkai.
“Kumba ka long mynta ka Uttarakhand kan pynlong ïa ka National Games ha u 2025 bad hadien yn bud sa ka Chattisgarh. Te kumta ka Meghalaya ka la nangjan ban ïoh pynlong ïa kane ka lympung kaba heh duh ha ka ri,” la pynpaw u Bah John haba ïakren bad u nongthoh khubor ha ka Sngi Balang.
“Ngi don jingkyrmen ba ngin ïoh ban pynlong ha u 2027 namar ha u 2026 kan don ka XXIII Commonwealth Games ha Glasgow, Scotland. Te kumta ha shwa ba ngin ïoh ban pynlong ngi la dei ban long kiba la khreh ba baroh ki jaka ïalehkai ki dei ban long kiba la biang shwa u 2026,” u la bynrap.
Haba kylli la ka Jylla ka don jingkyrmen ne em ban khur takma lada ka ïoh ban pynlong ïa katei ka lympung ha la ïing, u Bah Kharshiing u la ong, “Ban khur takma ha ka National Games ka dang eh bha, hynrei lada ngi lah ban pynlong ïa kum kine ki lympung ïalehkai kiba heh kan long ka jingïarap ïa ka Jylla ban ïoh ïa ki jaka ïalehkai kiba paka.”
“Lada ngi ïoh ban pynlong ïa ka National Games, kan shim por haduh 10 snem ba ngin lah pat ban sei ïa ki nongïalehkai kiba kynsai bad paw wat haduh ka Olympics bad ïa kane ngi lah ban sakhi na ki jylla bapher bapher jong ka ri kum ka Manipur bad ka Assam,” la bynrap biang u Bah John.
Shuh shuh ha kaba ïadei bad ki jingtei ïa ki jaka ïalehkai, u Bah John u la ong ba la khmih lynti ban pyndep ïa baroh ki jingtei hapoh u 2026. “Kumba ka long mynta kumba 75 na ka 100 ki jingtei ki dang ïaid ha kylleng ka Jylla kum ha Shillong, Jongksha, Tura bad kiwei kiwei ki jaka.”
