
Jowai, Nohprah 11
Ka New Shillong ka la long sa kawei pat ka kynhun kaba la buh jaka ïalade sha ka semi final jong ka lympung ïalehkai 8th Invitation Knockout Football Tournament” ba la pynïaid da ka Wahïajer Sports Club.
Kane ka jinglah ban pynthikna ka la wan hadien ba ka la lah ban pynliem noh ïa ka Sohphoh SC da 3-0 kol ha ka jingïalehkai quarter final kaba la long ha ka Sngi Balang ha madan Wahïajer Sports Complex.
Kumba ka paw na kane ka jingïakhun ki rangïalehkai ka New Shillong ka la lah ban ïalehkai bha naduh kaba sdang ha kaba ka liang pyrshah kam shym la lah ban shan hakhmat katei ka kynhun. U Rahbor Biano u la thep ar kol ha ka minit kaba 13 & 80 bad ïa kawei pat la thep da u Willinkton Nongrum (52). Ïa ka nam ‘Man of the Match’ la khur da u Rahbor.
Nalor ka New Shillong, kiwei de ki kynhun kiba rung semi final ki long ka Nangbah Mulang, Nong-dawah bad ka Jalapang SC.
Te kumta ka jingïa-lehkai semi final kaba nyng-kong kan long ha ka 21 tarik mynta u bnai hapdeng ka Jalapang pyrshah ïa ka New Shillong ha ka por 1:30 sngi.