Lyngba u Honesty pynliem ka Youngstar Namdong ïa ka United Phyllongingkhaw ha Thadlaskeiñ

Haba phai sha kawei pat ka jingïalehkai hapdeng ka Maia SC bad Madur ki la kut ha ka jingïakhaid hadien ba kim shym la lah ban thep kol haduh kaba kut ka jingïalehkai.

Jowai, Nohprah 12

Ka Youngstar Namdong ka la ïoh jingjop, katba ka Lumsyrtoh bad Nongkhroh rim, ka Maïa bad Madur ki la ïakhaid ha ka lympung ïalehkai Thadlaskeiñ Football League ba la pynïaid da ka Thadlaskeiñ Sports Association (TSA).

Ha ka jingïalehkai kaba la long ha ka sngi Palei ha madan Wahïajer Stadium, ka Youngstar Namdong ka la pynliem noh ïa ka United Phyllongingkhaw lyngba ka shi kol ba la thep da u Honesty Sumer ha ka minit kaba 39.

Haba phai sha kawei pat ka jingïalehkai hapdeng ka Maia SC bad Madur ki la kut ha ka jingïakhaid hadien ba kim shym la lah ban thep kol haduh kaba kut ka jingïalehkai.

Katba ka Lumsyrtoh ka la ïakhaid mar 1-1 kol pyrshah ïa ka Nongkhroh rim. Ïa ka kol jong ka Lumsyrtoh la thep da u Mark Andrew Thubru (65) bad ïa ka Nongkhroh rim la thep da u Haman myrboh (57).

Ha ka sngi Thohdieng ka jingïalehkai kan long hadpeng ka Mukhla Veteran pyrshah ïa ka Grounded FC ha ka por 10 baje mynstep, kumjuh ka Nartiang SC ïa ka Onfroy Unite FC ha ka por 12 baje mynsngi bad ka Tyrshang ïa ka Nongkhroh Sohbar ha ka por 2 baje nohphai sngi.