New Delhi, Nohprah:
Kumba la lum jingkheiñ la ong ba ka jingïap kaba bun kaba la kiew sha ka 1.5 Million ngut ki briew ha India man la u snem naduh u snem 2009 haduh u snem 2019 ka la long namar ka jingshah ktah slem ha ka jingjaboh kaba haduh PM2.5 man la u snem, ong ka jingwad bniah ba thymmai jong ka Lancet.
Katei ka jingwad bniah ba la pynmih ha kawei na ki lad phah khubor, ka ong ba baroh kawei ka jingbun briew jong ka ri India, kaba 1.4 Billion, ka shong ha ki jaka, kiba don ïa ka jingdon jong ka PM2.5, kaba kham heh ban ïa kaba la ai jingmut da ka World Health Organisation ha ka shisnem kaba long 5 Microgram ha ka shi Cubic Metre.
Ki nongwadbniah, ba kynthup ïa kito kiba don ha Ashoka University bad Centre for Chronic Disease Control, ki la lap ruh ba la jan 82% na ki nongshong shnong jong ka ri India, lane 1.1 Billion, ki shong ha ki jaka ba don ka jingdon jong ka PM2.5 ha ka shisnem kaba palat ïa kaba la ai jingmut da ka Indian National Ambient Air Quality Standards (40 Micron ha ka shi Cubic Meter).
“Ka jingjaboh ka lyer kaba jur palat ha India ka ïarap ïa ka bynta kaba kham heh jong ka jingïap ban ïa kaba la antad mynshuwa, da ka jingïap kaba jur wat ha ki jingkhluit kiba kham duna ïa ki kyndon jong ka lyer jong ka ri India mynta. Kane ka jingpule, bad ki sakhi kiba don na kiwei pat ki jingpule ha kylleng ka pyrthei, ki pynskhem jur ïa ka jingdonkam jong ka India ban ai ïa ki kyndon kiba biang ban pynduna ïa ka jingmih lyer bad ban ïada ïa ka koit ka khiah jong ki paidbah,” ka la ong.
“Ha India, ki briew kiba sah ha sor bad katto katne ki jaka nongkyndong ki shah ktah ha ka jingbun jong ka PM2o5 ha baroh shisnem,” ong ka jingwad bniah.
Ka jingjaboh kaba kham duna, lane ka PM2.5, ka mih na ki bynta kiba hapoh 2.5 micron ha ka jingheh.
Ka jingkiew ha ka jingjaboh jong ka PM2.5 man la u snem kaba 10 micron ha ka shi Cubic Meter ka don jingïadei bad ka jingïap kaba kham bun ha ka shisnem da 8.6 percent, la lap ki nongwad bniah.
Ki nongwad bniah ki la peit ïa ki jingïap manla u snem naduh u snem 2009 haduh u snem 2019 ha ka kyrdan distrik ha kylleng ka ri India bad ki ïoh ïa ka jingdon jong ka PM2.5 manla u snem, da kaba pyndonkam ïa ki jingtip na ki Satellite bad palat 1,000 tylli ki jaka peitngor ïa ka khyndew. Ïa ki jingtip jong ka jingiap la shim na ka Sivil Registration System.
Ka kynhun ka la ong ba ki sakhi halor ka jingshah ktah slem ha ka jingjaboh bad ka jingïap ha India kim ïahap bad ki jingpule na kiwei pat ki ri.
