
Shillong, Nohprah 13
U Myntri ka Sorkar Pdeng jong ka tnad Ïalehkai, Dr. Mansukh Mandaviya un plie ïa ka ‘Fit India Cycling Tuesdays’ ha ka sngi Ba-ar ka 17 tarik u Nohprah ha New Delhi. Ha kane kajuh ka sngi, yn pynlong ïa ka jingñiah cycle na madan Sports Authority of India (SAI) Sports Training Centre, Shillong.
Ha Shillong ïa kane lympung yn sakhi lang da u Kevin Lyngdoh, uba la khur 2 tylli ki takma rupa ha ka kyrdan Youth XCO Time Trial bad Mass strat, bad u Aaron Oniel Kharpur, uba la khur ïa ka takma ksiar bad u Taitus Ch Marak uba la khur ïa ka takma rupa ha ka kyrdan Downhill Elite, ban ïalam ïa ka 05 kilometer ñiah cycle sngewtynnad hapoh bad kylleng jong ka NEHU Campus.
Ka jingïalang ha ka Sngi Ba-ar ha SAI STC SHILLONG kan pyni ïa ka jingshim khia jong kane ka thaiñ ban kyntiew ïa ka ñiah cycle ha ka leit ka wan kaba lah ban pynneh pynsah bad kum ka rukom kilan met. Ki nongïashim bynta kin sdang na ka khyrdop jong ka SAI STC Shillong naduh ka por 9:00 baje mynstep, hapoh bad kylleng jong ka NEHU Campus.”
Ka Ministry of Youth Affairs and Sports ka la pynlong ïa kine lympung da ka jingïatreilang bad ka Cycling Federation of India India (CFI), katba ha Shillong yn pynlong da ka jingïatreilang bad ka Meghalaya Cycling Association (MCA).
Kane ka jingthmu jong ka ‘Fit India Cycling Tuesdays’ kan phriang sha palat 100 tylli ki jaka kylleng ka ri India ha ka 17 tarik u Nohprah, ryngkat ha kajuh por jong ki lympung ban long ha kylleng ki centre jong ka SAI. Hadien kane ka jingpynbna, ka jingñiah cycle kan bteng man ka Sngi Ba-ar ha kylleng ka ri.
Ka Fit India Movement, kaba la sdang da u Myntri Rangbahduh ba donburom, u Narendra Modi ha u 2019, ka dei ka prokram ba kongsan kaba buh lynti ïa ka India ban long ka ri kaba khlaiñ bor tam ha ka kam ïalehkai. Kane ka Movement ka pynleit jingmut ha ka liang ka koit ka khiah, ka liang ka jingïalehkai sports, bad kyntiew ïa ki jingïalehkai tynrai jong ka ri.