Lahduh ka Mawtneng SC ha ka 1st Division & Rongdop SC ha ka 2nd Division jong ka RBDSA

Te kumta dei ha ka tie-breaker ba ka Rongdop ka la lah ban pynurlong ïa ka jingjop.

Nongpoh, Nohprah 15

Ka lympung ïalehkai Ri Bhoi League ba la pynïaid da ka Ri Bhoi District Sports Association (RBD-SA) ha ka 1st Division bad 2nd Division, ka la poi sha kaba kut ha ka sngi Saitjaiñ ha kaba ka Maw-tneng SC bad ka Rongdop SC ki la long ki lahduh.

Ha ka jingïakhun final ha ka First Division kaba la long ha madan ïalehkai jong ka shnong Umdihar, ka Mawtneng ka la pynliem noh ïa ka Umsait-sning Sports Club da 1-0 kol ha ka jingïakhun kaba ïakhaid bad shongshit bha ryngkat ka jingwan sakhi jong ki spah ngut ki nongkyrshan na kylleng ka thaiñ Ri Bhoi.

Haba phai pat sha ka phainal jong ka Second Division, ka Rongdop SC ka la pynliem noh ïa ka Kyrdem SC lyngba ka tie-breaker da 4-3 kol. Ha kane ka jingïakhun ki la ïakhaid mar 2-2 kol bad haduh kaba kut jong 90 minit ki la ïakhaid mar kajuh.

Wat hadien jong ka extra time, kitei baroh ar ki kynhun ki ba pyrshang ban pynkhih jar, hynrei baroh ar ki kynhun ki la ïa trei shitom bad hangne ka jingïakhun ruh ka la kut noh ha ka jingïakhaid. Te kumta dei ha ka tie-breaker ba ka Rongdop ka la lah ban pynurlong ïa ka jingjop.

Kum ka lahduh ha ka First Division ka Mawtneng ka la khur ïa ka song pisa T. 60,000 hajar ryngkat ka Trophy, katba ka Umsaitsning kaba wan ba-ar ka la ïoh T. 30,000 ryngkat ka trophy. Ha ka Second Division pat, ka Rongdop ka la ïoh T. 40,000 ryngkat ka trophy katba ka Kyrdem SC ka la ïoh T. 20,000 ryngkat ka Trophy.

Ha katei ka sngi la wan ban pynhap pyrda da u Bah Mayralborn Syiem, MLA ka Nongpoh konstitwensi ha ka jingïadon lang u MDC ka Nongpoh, Bah Balajied Rani, u President ka RBDSA, Bah R.B Shadap, u nongaibuit ka RBDSA, Bah R.R Makdoh nalor kiwei kiwei  ‘riew rangbah ka thaiñ.