Shillong, Nohprah 17
U Abhishek Kumar u la ïoh 5/45 pyrshah ïa ka Railways, katba u kapten u Kevin Christopher u la ïoh ïa ka shiteng spah, wat la ka Meghalaya ka dang duna sa 95 ron ha ka jingïakhun ba ar jong ka BCCI U-23 Men’s State A Trophy ha Nagpur ha ka Sngi Ba-ar.
Wat la ka dei ka jingshah rem, hynrei ka dei ka jingïalehkai kaba ai mynsiem bad pynshlur ïa ka kynhun baroh kawei katba ki nang ïaid shakhmat sha kane ka lympung.
Ka Meghalaya ka la jop kynting pisa bad ka la jied shwa ban kawang bol nyng-kong. Ka Railways ka la sdang ïalehkai bha ha kaba ka la hap tang shi wiket na ka bynta 194 ron. U Abhishek u la sdang ban ïalehkai bha ha kaba u la lah ban pynhap haduh 3 wiket.
Ka Railways ka dang lah ban kynjoh sha ki 301/9 ha ki 50 over ba la buh, hynrei kane ka long kaba duna bha na kaei kaba ki lah ban khmih lynti. Kiwei pat ki rangïalehkai ka Meghalaya kiba la lah ban pynhap wiket ki long u Gulgul Sangma (2/53) bad u PM Santhosh (2/65).
Nangta, ki nongtied jong ka Meghalaya ki la pyni ba ki lah ban bat ïa la ka jong ka jingïalehkai pyrshah ïa ka jingshah thombor kaba bha, watla katto katne ngut ki nongïalehkai ki la mih hadien ba ki la sdang bha bad ki ju sahdien ha ka jingïalehkai kaba donkam kumjuh.
U Sachin Kumar u la tied 37 na 75 bol bad u Thunun Marak (24 run na 38 bol) ki la lah ban kynjoh sha 46 na ka bynta ka wiket ba ar. Ka jingshah pynhap noh u Sachin ka la plie lad ïa u Kevin ban wan tied ha kaba u la lah ban kynjoh sha 52 run na 73 bol, kaba kynthup ïa hynriew tylli ki ‘four’. Hadien kane u la ïatreilang bad u Josiah Momin (36 run na ka 43 bol, 5x4s, 1×6) na ka bynta ban kamai 57 run na ka bynta ka wiket ba phra.
Ka run kaba donkam, ka la shah khanglad ïa ka Meghalaya namar ba ka la lah ban kamai tang 206/9 ha ki 50 over.
Kumba ka paw ka Meghalaya ka la shah rem ha ka jingïalehkai ba nyng -kong ha ka Maharashtra ha ka sngi U Blei bad kan pynkhreh ïa ka jingïaleh -kai kaba lai pyrshah ïa ka Baroda ha ka sngi Palei.
