Mawkyrwat, Nohprah 18
Kan long ka sien kaba nyngkong eh ba ka nongbah Shillong kan ïoh ban pynlong ïa ka jingïalehkai bar ri (international) hapdeng ka India bad ka Bangladesh, la pynpaw u President ka Meghalaya Football Association u Bah Hamletson Dohling ha ka jingplie ïa ka lympung ïalehkai 1st & 2nd Division Football League 2024-25 ba la pynïaid da ka Ranikor Civil Sub Division Sports Association (RCSDSA) ha ka 16 tarik mynta u bnai ha madan Nolikata, South West Khasi Hills District.
“Ka All India Football Federation mynta ka don ïa ka jingthmu ban pynlong lympung ïalehkai phutbol ba heh bha hapoh dewbah Asia ka ban sa pynlong ha nongbah Shillong ha u Lber jong u snem 2025 hapdeng ka India bad ka Bangladesh bad kiba jop kin ïoh rung ban ïaleh ha ka Asian Cup.”
Haba ïadei bad ka jingplie ïa katei ka lympung ïalehkai 1st & 2nd Division, u Bah Hamletson u la ai khublei ïa ka Ranikor Civil Sub Division Sports Association (RCSDSA) kaba la pynlong kum kine ki lympung kaba long shi bynta ban kyntiew ïa ki samla ha liang ka jinglehkai phutbol, bad u la bynrap ruh ba na ka liang ka MFA ka don ïa ka jingthmu na ka bynta ban kyntiew ïa ka kam ïalehkai phutbol ym tang ha ki jaka sor, hynrei wat ha ki jaka nongkyndong ruh.
U la ong ruh ba lada ki samla ki ïai mlien ha ki kam ïalehkai, kin sa long ruh ki samla kiba lait na ki jingsniew ba bun jait namar ka jingmut jingpyrkhat jong ki kam don por ban pyrkhat ïa ki jingbam jingdih kiba pyntroiñ ïa ka met jong ki.
Ha katei ka sngi sdang ïa ka lympung, ka Evergreen Sports Club bad ka Domsohkhai S&CC ki la ïakhaid khlem don ba thep kol.
